Белгили экени йимик, «Акъ турналаны гюнлери» деген адабият фестиваль бир башлап Дагъыстанны халкъ шаири Расул Гьамзатовну сиптечилиги булан юрюлюп турду. Савлай дюньягъа аты айтылгъан шаир яшавдан гетгенли, ЮНЕСКО-ну якълаву булан юрюлеген шо фестивальны оьтгерилеген гюнлери ону тувгъан гюнюне раслаш-дырыла ва гьар йыл сентябр айны баш гюнлеринде оьтгериле.
Бугюнлерде де фестиваль бизин уьлкеден йимик, тыш пачалыкълардан да кёп санавдагъы шаирлер ва язывчулар гелип, уллу шаир тувгъанлы 100 йыл битегенликге багъышланып, 37-нчи керен юрюле. Фестивальны оьлчевюнде «дёгерек столлар», конференциялар, адабият ахшамлар, олай да выставкалар, оьр ва орта билим береген охув ожакъларда ёлугъувлар оьтгериле. Шолай, ачыкълашдырып айтгъанда, сентябр айны 6-сындан тутуп, «Акъ турналаны гюнлерине» гелген къонакълагъа инг алда бизин республиканы тахшагьары булан, бирге Расул Гьамзатовну атына байлавлу ерлер булан таныш болмагъа имканлыкъ бериле.
Тюнегюн, сентябр айны 7-нде, Поэзияны театрында Россияны язывчуларыны секретариатыны генгеши болду. Шондан сонг, Р. Гьамзатовну атындагъы Милли китапханада «Расул Гьамзатовну шаирлик асрусу» деген Бютюнроссия конференция юрюлдю. Шону барышында Темиркъазыкъ Кавказны республикаларындан, олай да бизин уьлкени оьзге ерлеринден, Луганск ва Донецк республикаларындан, гьатта Белоруссиядан гелген къонакълар аты савлай дюньягъа айтылгъан шаирни яратывчулугъу-на оьр къыймат берегенин малим этди.
Бугюн, сентябр айны 8-нде, Р. Гьамзатовну тувгъан гюнюнде, мердешленип къалгъанда йимик, ону къабуруна гюллер салынажакъ. Бизин республиканы оьр гьакимлик къурумларыны вакиллери де ол даимлик яллыкъ тапгъан Таргъу тавну этегиндеги къабуруну уьстюне чыгъажакъ. Ленинчи комсомолну атындагъы паркда ерлешген «Уьстюнлюкню гелтирген воинге» салынгъан эсделикни алдында митинг болажакъ. Шондан къайры да, халкъ саниятчылыкъны фестивалы, бизин республиканы белгили ва оьзбашына чалышагъан йыравларына оьзлени пагьмусун гёрссетмеге имканлыкъ береген концертлер оьтгерилежек.
Орус театрны уллу залында Расул Гьамзатовну 100 йыллыгъына багъышланып жыйын болажакъ деп де къаравуллана. Дагъыстанны ша-ирлери ва язывчулары булан бирге гелген кьонакълар Расул Гьамзатов тувуп оьсген Хунзах районну Цада юртуна да етишежек. Шонда да шаирни эсделигине байлавлу юрюлген гьаракатларда ортакъчылыкъ этежек. Чинкдеси, бугюнлерде бизин республиканы шагьарларында ва юртларында уллу шаирни асарлары чалынып туражакъ.
Н. БАЙБОЛАТОВ.
