Адам этген садагъаны бу дюньяда да, ахыратында да  уллу пайдасы бар экенни барыбыз да билебиз. Дагъыстанны халкъы да тарыкълы болгъанда кёмек къолун узатмагъа гьазир турагъанын гьар заман исбат этип гелген. Мисал учун, август айны 14-де болгъан уллу хатабалагьны къурбанларына гьар-бир якъдан дагъыстанлылар болгъан кёмегин этип турду.

Кёмек этегенлени арасында уллулар да, яшёрюмлер де къасткъылып айланды. Ондан къайры да, гьар тюрлю фондлардан таба хатабалагьны натижасында гечинген адамланы агьлюлерине, яралангъан яда машинлери бузулгъан адамлагъа кёмек этмек учун харж жыйылды.  Мисал учун бир нече гюнню ичинде  Tooba деген фондгъа  72 минг адамдан харж гелген.  Эсгерилген халкъара фондну яратгъан Рамазан Межитовну айтывуна гёре, адамлар йибереген харжны къадары 5 манатдан 300 мингге ерли болгъан. «Садагъаны азы-­кёбю болмай, юрегине тутгъан  негетине  гёре бола», – дей ­Р. Межитов.

Эсгерилген фондгъа акъча йибергенлени 30 проценти – дагъыс-танлылар къалгъан 70 проценти  Россияны оьзге регионларындан ва башгъа пачалыкъларындан гелгенлиги де адамлар башгъаланы къайгъысына немкъорай янашмайгъанлыгъын исбатлай.

Бизин республикада етишип болмайгъан агьлюлеге, авруйгъан яшлагъа ва башгъа кёмекге  харлы агьлюлеге, адамлагъа кёмек этип гьаракатчы кюйде чалышагъан дагъы да кёп фондлар бар. Оланы арасында аслам иш юрютеген «Инсан» ва «Надежда» фондланы айрыча эсгермеге тюше. Алдагъы гюнлерде эсгерилген фондланы ва башгъа жамият къурумланы ёлбашчылары булан ­ДР-ни Башчысы Сергей Меликов ёлугъув оьтгерген. Ёлугъувну аслу темасы – хатабалагьда зараллангъанлагъа кёмек этив. С. Меликов фондланы ёлбашчыларына баракалла билдирген. Ол  эсгерген кюйде, зараллангъанлагъа кёмекни аслам пайы республика бюджетден «Все вместе» деген фондан ва «Надежда», «Инсан» деген рагьму­лу ишлени фондларындан берилежек.  Уьйлери, машинлери ва башгъа мал-матагьы бузулгъанлагъа  бюджетден харж маялар   берилежек. Эки  де фондгъа   шо гюнлерде умуми алгъанда 60 миллион манат акъча жыйылгъан.

 

Патимат БЕКЕЕВА.