Отну, сувну, елни балагьындан Аллагь сакъласын! Артдагъы йылларда савлай уьлукебизде йимик, бизин республикабызда да топуракъны, сувну тюбюндеги ва уьйлени ичиндеги газ быргъыларгъа-къураллагъа тергев осаллашагънда, ягъарлыкъ яшыртгъын чыгъагъаны саялы, атылывлар болагъаны теренден ойлашдыра.
Атылывлар не йимик себеплерден тувулуна, хатабалагьланы натижасында болагъан уллу тас этивлени алдын алмакъ учун не йимик чаралар гёрмеге тюше деген соравлар арагъа чыгъа. Шолай агьамиятлы масъалагъа байлавлу болуп бугюнлерде «Дагъыстан» деген республика маълумат агентлигинде Дагъыстанда иш гёреген Яшавлукъ пачалыкъ инспекцияны башчысы Сергей Касьяновну прес-конференциясы оьтгерилди.
– Табии газ ягъарлыкъдан пайдаланагъанланы аманлыгъын гьисапгъа алып Россияны яшавлукъ кодексине ювукъ заманны ичинде алмашынывлар этилежек, – деди оьзюню баянында Сергей Касьянов. – Алмашынывлар газны пайлап берегенлени, къоллавчуланы ва шолай да тергевчю къурумланы оьз борчларына янашывун камиллешдиривге байлавлу болуп гёз алгъа тутула.
Белгили болгъан кюйде, газны берегенлени ва шолай да къоллавчуланы арасында айрыча хас дыгъарлар къурулажакъ. Дыгъарланы ичинде буса газчыланы ва къоллавчуланы борчларына байлавлу шартлар да айрыча хат булан эсгерилежек. Гёз алгъа тутулгъан чаралар 1-нчи сентябрден тутуп, 2024-нчю йылны 1-нчи январына ерли узатылажакъ ва пайдаландырывгъа берилмеге башланажакъ.
Арагъа салынгъан агьамиятлы масъалагъа байлавлу болуп республикабызны журналистлерини янындан Яшавлукъ пачалыкъ инспекциясыны башчысына кёп къадарда соравлар берилди. Берилген соравлагъа къайтарылгъан жавапланы агьамиятлыгъын гьисапгъа алып, «Ёлдашны» гележекдеги номерлеринде эркин кюйде маълумат бермеге умут этилине.
Къ. КЪАРАЕВ.
