Шогъар байлавлу болуп бугюнлерде «Дагъыстан-ЭКСПО» деген республика выставка центрыны директору Магьаммат Саругъланов ва Дагъыстанны промышленност, сатыв-алыв ва инвестиция министерлигини промышленностда машинлешдиривню янгы асувлу къайдаларын къоллав булан машгъул болагъан управлениесини начальниги Магьамматнаби Муртузалиев ёлдашлар маълумат къуралланы вакиллерине баянлыкъ берди.
– Алда йимик бу гезик де выставкада республиканы предпринимателлерини центры ва шолай да енгил промышленностуну предприятиелери де ортакъчылыгъын болдурма токъташгъан, – деди Магьаммат Саругъланов.– Неге тюгюл, выставка регионланы гьар тюрлю предприятиелерини, далапчы тайпаланы арасында юрюлеген тогъатартывну натижаларын малим этмеге герек.
Бу гезик выставкада аслу ерни «Янгы индустриализациялашдырыв» деген агьамиятлы программагъа гёре гьазирленген бёлюгю тутажакъ. Шону булан янаша гьар тюрлю яшавлукъ къуллукълар, ашамлыкъ ва промышленный маллар да хас бёлюклерде ерлешдирилежек.
Белгили болгъан кюйде, выставканы оьтгеривню аслу мурады – ломайлап ва увакълап маллар сатыв ва шолай да, къуллукъланы болдурув булан машгъул болагъан предприятиелени ва къурумланы гьаракатына онгайлыкъланы болдурув ва дыгъарлашывлар этив.
Оьтген йыл йимик бу гезик де Россияны гьар тюрлю регионларындан выставкада 100-ден де кёп предприятиелер ва къурумлар ортакъчылыкъ этежек деп къаравуллана.
Выставканы оьлчевюнде ону ортакъчыларыны, къоллавчуланы алывчуланы талапларын гьисапгъа алып, «дёгерек столлар», малим этивлер (презентация), конференциялар ва генгешлер оьтгерилежек.
Шогъар байлавлу ону ортакъчыларыны гьакъында реклама, маълумат каталог жыйымларда топланып, хас ерлерде ерлешдирилежек.
Къ. КЪАРАЕВ.
