Чарслы, увакъ сыгъанакъ гелеген чакъгъа да къарамай, Бабаюртну центрында ярмакюге деп гелген кёп адам бар эди. Эртерекден районну юртларындан  гелип, юрт хозяйство ашамлыкъ малланы болдурув булан машгъул сабанчы-фермер хозяйстволаны, акционер жамиятланы, онгача иш гёреген далапчыланы юрт хозяйство маллары юкленген машинлери тизилип токътай.

Ярмакюде, гертиден де, кёп тюрлю продукталар бары, чинкдеси, ашамлыкъ маллагъа артып тербейген багьаланы вакътисинде ярмакюдеги учузлукъ кимни де тергевюн тартды.

Сабанчы Абдулла Тариков ярмакюге Янгылбай юртдан яш гьайванны этин алып гелген, килосун 190 манатдан сата… Хамаматюртдан «Юзюмчю» деген сабанчы хозяйство да оьз продукциясын алып гелген. Ону машинини алдында майы агъылып гелеген мазаллы къазланы килосуна 250 манат, арив таза балны ярым литрлик банкасына 400 манат деп багьалары салынгъан.

Хасавюртдагъы тавукъ ферма  болдурулгъан йымырткъаны, Ботаюртдан «Батыр» деген бройлер тавукълар оьсдюреген ферма буса оьзлени тюрлю-тюрлю продукталарын сатывгъа чыгъаргъан. Оланы ашамлыкъ маллары да гёз алдыбызда дегенлей сатылып битди. 

Бабаюртдагъы «Нур» деген фермер хозяйство даим кёп санавда тюрлю-тюрлю гьайванчылыкъ продукталаны сатывгъа чыгъарагъанына районлулар уьйренип де къалгъан. Бу гезик де хозяйство увмабишлакъны, бишлакъны, къаймакъны, ювуртну, толгъан ичекни, къакъ этни алывчуланы алдына эркин этип салгъан эди. Эсгерилген малланы багьасы да алывчуланы кисесине авур тиймейгенге гёре, къапеселени алдында адамлар бири-бирин алышдырып, гезигине гёре ашамлыкълагъа сумкаларын толтурдулар.

Алимпашаюртдагъы «Лайна» деген сабанчы хозяйство да ярмакюге сют ва акъкъатыкълар, сав ва союлгъан гюргюрлер, къазлар алып гелген. Адил Янгыюртдан Т. Къамавов, Герменчикден Р. Абдурагьманов 200 манатдан тавукълар, «Къазиюрт» СПК-дан, Тамазатёбеден, Тотаюртдан – дюгю, Уцумуюртдан – къабакъ, согъан, Алимпашаюртдан – будай, арпа гелтирилген эди.

Районну юртларындан гелген янгы союлгъан гьайван этден башлап, бир номерли Львовскидеги «Нияро» деген жамиятда болдурулгъан бузлагъан чабакъгъа ерли алывчулар учуз багьасында алмагъа бола эди. Алма да алдылар. Алывчуланы бирлери мюкюр болгъан кюйде, олар аслам этип алагъан ашамлыкъ малланы себеби етишип гелеген Янгы йыл байрам ва базарда артып тербейген багьалар булан байлавлу…

Лап да аслусу, бабаюртлулар шо меселдеги ярмакюлени чакъда-чакъда оьтгермекни яны болуп да сёйледилер. Шо буса, мен ойлашагъан кюйде, янгыз алывчулар учун тюгюл, ашамлыкъ малланы болдурувчулар учун да тарыкъ.

Ярмакюде тюш авгъанча сатыв юрюлдю. Юрт хозяйство маллар болдурувчуланы бошалып гетеген машинлерин эслегенде, гертилей де, ярмакю халкъ учун да, сабанчылар учун да пайдалы болгъаны ачыкъ болду.

 

 

 

А. ХАМАМАТОВ.

Бабаюрт.

СУРАТДА: ярмакюден гёрюнюш.