Темиркъазыкъ Кавказны маълумат къуралларыны ассоциациясыны ишлерин кютеген директору Ражап Мусаев билдирген кюйде, министр Азнавур Гьажиев булан гьар заман байлавлукъгъа чыгъып бола. Олай да, ол маълумат къуралланы тармагъында арагъа чыгъагъан янгы сиптелени якълай. Р.Мусаев дагъы да эсгергени йимик, шо Интернет савгъатны «Чудеса Кавказа» деген биринчи тирети Дагъыстанда оьтгерилген. ДР-ни печатгъа ва маълуматгъа къарайгъан министри шону яшавгъа чыгъарывгъа болушлукъ этип тургъан.
А. Гьажиев форумну оьлчевюнде декабр айны 4-нде оьтгерилген «Дербент 2000: юбилейни алдындагъы маълумат имканлыкълар» деген «дёгерек столда» ортакъчылыкъ этген. Шо «дёгерек столну» ишинде Дербент шагьарны башчысы Имам Яралиев, ДР-ни печатгъа ва маълуматгъа къарайгъан министрини биринчи орунбасары Зубайру Зубайруев де ортакъчылыгъын болдургъан.
Бизин республика учун форумда гёрсетилген ерлерде Дагъыстанда чыгъарылагъан газетлер ва журналлар, олай да телевидение ва Интернет маълумат къураллар булан таныш болардай шартлар яратылгъанын айрыча айтмагъа тюше. Шондан къайры да, олагъа Дербентни 2000 йыллыгъын белгилевге байлавлу юрюлеген гьаракатны барышы булан таныш болмагъа, Россияны лап да бырынгъы шагьарыны гьакъындагъы документли фильмге къарамагъа имканлыкъ берилген.
Бизин республиканы атындан форумда 20 милли газет, 3 журнал, Темиркъазыкъ Кавказны халкъларыны тиллеринде чыгъарылагъан китаплар, 2 телеканал ортакъчыланы тергевюн тартгъан.
Оьз мухбирибиз.
