Гьайдакъ район администрацияны прес-къуллугъу билдиреген кююнде,  конкурсну аслу мурады – орамланы тазалыгъын ва гёзеллигин аян этмек. Шолайлыкъда, айлана якъны аманлыгъын ва тазалыгъын къорувгъа юртлу ватандашланы къуршав яхшылаша, яшавлукъ ва маданият ишлеге иштагьлыгъы къолайлаша демеге ярай.

– Озокъда, шону натижасында юртлу ватандашланы асувлу жамият ишлерде ортакъчылыгъын болдурма гёнгю ачыла, – дей район администрацияны маданият бёлюгюню начальниги Магьамматзапир Аммаев. – Хоншуланы арасында макътавлу милли мердешлеге аминликни сингдирив, оьз элине бакъгъан якъдагъы сююв гьислени гётерив де –бугюнгю конкурсну аслу мурады.

Белгили болгъан кююнде, къарав-конкурс «Лап да таза орам», «Инг де арив онгарылгъан уьй, идара» ва «Анадаш орамым, гьашыкъман сагъа» деген номинациялагъа гёре оьтгерилди. Шону учун 15 адамдан къурулгъан жюрини членлерине Мажалисни орам-орамына тюшюп дегенлей, ожакъ-ожакъгъа гирип, хыйлы заман иш гёрмеге, айланмагъа тюшдю.

Къарав-конкурсну натижаларын чыгъарывгъа байлавлу шатлыкъ жыйын алданокъ гьазирленген маданият программагъа гёре «Гьайдакъ район» деген муниципал къурулувуну маданият къаласында болду.

Белгиленген номинациялагъа гёре лайыкълы орамлар аян этилинген сонг, жюрини членлери бирдагъы номинация къошуп, «Лап да сыкълашгъан орам» деген атны токъташдырып, Къадыровну атындагъы  орамгъа да шолай ат берилди.