Алдагъы гюнлерде «Солнечный берег» деген ял алыв ва охув центрында Дагъыстанны Конституциясыны гюнюне багъышлангъан «Яшлыкъны тюрлю ренкли энемжаясы» деген гьаракат оьтгерилген.
Къарабудагъгент район китапханасыны къуллукъчуларыны къасты булан шо гьаракат яшланы китап охув булан машгъул этмек муратгъа байланып юрюлген. Шону барышында эсгерилген китапхананы къуллукъ-чулары Субайбат Гьажиева ва Азинат Пашаева биринден-бири алып дегенлей, бизин республиканы Аслу Законуну амалгъа геливюню тарихи гьакъда яшлагъа баянлыкъ берген. Шону булан бирге Дагъыстанны Конс-титуциясында гьар ватандашны, оланы арасында яшланы да ихтиярлары ва борчлары белгиленгени гьакъда лакъыр юрютген. Яшлагъа гьар тюрлю соравлар берип, бизин республиканы Конституциясыны бир-бир гесим-лерини маънасын ачыкъ этген. Къарабудагъгентдеги юрт китапхананы яш охувчулары Ватангъа, тувуп оьсген элине багъышлангъан шиъруланы да къурчун къандырып охугъан.
Шондан сонг яшлар оьзлер учун гьазирленген белгили орус ва да-гъыстан шаирлер ва язывчулар язгъан асарлагъа, олай да халкъ авуз яратывчулугъуна байлавлу гьар тюрлю яратывчулукъ тапшурувланы кютген. Оланы маънасын ачыкъ этип, кёп тюрлю соравлагъа жаваплар берген.
Къарабудагъгент район китапхананы ёлбашчысы Аминат Сотаева бизге билдирген кюйде, оьтгерилген шо гьаракатда ортакъчылыкъ этген яш булан уллуну санаву 300-ге де етише. Шо гьаракатны вакътисинде юрюлген сынавларда айрыча жагьлыкъ гёрсетген яшлагъа китаплар савгъат этилип берилген.
