Магьамматрасул АКАЕВ:


“Алтын къанат къувумсан”

Магьамматрасул АКАЕВ 1961-нчи йыл Буйнакск шагьарда тувгъан. Капиркъумукъ юртдагъы орта школаны, сонг Магьач-къаладагъы политехника техникумну охуп битдирип, асгер къуллукъгъа чакъырылгъан. Гьава-десант бёлюклерде къуллукъ этген.

Къайтгъанда гьар тюрлю къуллукъларда ишлей туруп, оьр билим ала, 1995-нчи йылдан 2006-нчы йыл болгъунча Россияны асгер бёлюклеринде къуллукъ эте туруп, батальонну командирини кёмекчисине ерли гётериле.

Мычыгъыш республикада юрюлген дав гьаракатларда ортакъ-чылыкъ этип, майор чининде отставкагъа чыкъгъан. Магьамматрасул агьлюсю булан бирге эки авлетни аякъгъа миндирген, уьй этгенлер.

Къумукъ тилин, халкъыны адат-къылыкъ мердешлерин яхшы билеген ва янгылмай юрютеген Магьамматрасул Акаев, оьсюп гелеген яш наслуну тюз ёлда тарбиялавну гьайында чалышагъандан къайры да, юртну ва жамиятны ишлеринде жагь кюйде ортакъчылыкъ эте.

Казим КАЗИМОВ.

Тамазаны ойлары


Къарт таянып таякъгъа

Гюнжувакъда кюстюне.

Умут тарта якъ-якъгъа,

Ой къона ой уьстюне.


Сакъалына акъ гирген,

Аякълары къартыллай,

Ирип барагъан акъ къар

Бир тамаша йыртыллай.


Шу къар йимик оьмюр де

Ирип-дёнюп битерми?

Яшавда белин язмай

Ахыр гюнге етерми?


Бир токътавсуз ишлеген,

Къолундан бел таймагъан

,Ял болма да денгизге

Айланып бир бармагъан.


Талагъа да чыкъмагъан

Юрек ачып ял алма.

Тавлагъа да бакъмагъан

Гёзелликге къош салма.


Къол загьматдан къайры да,

Гьайван-малгъа къарагъан.

Не гёрдюм деп дюньяда,

Оьз-оьзюне сорагъан.


Бав оьсдюрген ажайып,

Адам сукъланар йимик.

Уьйлер къургъан къаст этип,

Хансарайлардай бийик.


Ата борчдан къутулгъан,

Тенгири берип улан,

Аллагьгъа макътав эте

Юзюню нюрю булан.


Авлетлеге уьлешген

Бар сюювюн аямай.

Бу байлыкъ гьалал магъа

Къалгъан сонгун сорамай!

Гетдинг, анам


Къарап туруп мен асгерден гелгинче,

Гетдинг, анам, элли уьчге етгинче.

Аврувунгну алдын алып болмадым,

Сагъа къарап минг гюйдюм, минг ялладым.

Авлетлеринг къарай къалдыкъ бозара

Етти етим, атабызны санамай.

Гёзьяшыбыз бюртюк-бюртюк агъызды,

Ял болмады Тенгир бизин сынамай.


Гетдинг, анам, артда къалды къаравунг,

Умутларынг уллу эди нече де.

Гюз гелгенде этербиз деп тоюнгну

Загьмат тёкдюнг, ял тапмай гюн-гече де.

Гетдинг, анам, янгур булан, ел булан

Гёнгюллени къайгъы-дертден толтуруп.

Къардаш болуп яшагъыз деп эл булан,

Гьалал экмек ашагъыз деп олтуруп.

 * * *

Язны яллав гюнюнде

Сюзюк-салкъын сувумсан.

Къайгъы-дертим уьркютген

Алтын къанат къувумсан.


Сатыргъа сатыр тагъып,

Сююв шынжыр этемен.

Юрегиме гирген сонг

Сени сюймей нетемен?


Сююв женнетден чыкъгъан,

Деп сёйлене гьашыкълар.

Гьакъ сюювню сан этмей

Юрюй янгыз шашыкълар.


Бир мюгьлет къалсам гёрмей,

Янаман да, гюемен.

Кимлер не сёйлесе де,

Сюемен де, сюемен!

Масхара-герти булан


Эрине буса ярай

Уьйге къуллукъ этмеге.

Къашларын тююп къарай,

Ювукъ болсам оьпмеге.


Янтайсам, юхлай дейсен,

Юхласам, турмай дейсен.

Тарыкъда харж болмаса,

Яшавну къурмай дейсен.


Ойлашсам, гёпген дейсен,

Гьакъылдан гетген дейсен.

Кепим гелип кюлесем,

Шашып да битген дейсен.


Жыйып-топлап салсам да,

Жыйгъанынг етмей дейсен.

Гьонкъазакълап къалсам да,

Бир зат да этмей дейсен.


Сакъал-мыйыкъ юлюсем,

Башгъагъа бакъгъан дейсен.

Авзум-бурнум ийислеп,

Бугъар жин къакъгъан дейсен.


Кюйленмес къомуз къылдай

Мен де дюрмендир яман.

Къошулгъаныкъ къыркъ йылдыр –

Кюйлер этгенинг таман!..

Адабият бёлюк.