Алдагъы гюнлерде Буйнакск райондагъы Капиркъумукъ юртну маданият къаласында районну инчесаният школаларына къуршалып оьзлер ушатагъан касбуланы уьйренме муштарлы ва оьзтёрече пагьмулары булан ата-аналарын, тарбиялавчуларын сююндюреген охувчу яшланы гьисап берив байрамы оьтгерилди. 

Эсгерилген байрам концертде аслу гьалда республика, Бютюнроссия, халкъара конкурсларда ва фестивалларда уьст гелген, ким де сукъланма болардай пагьмулу ишлери, чыгъышлары булан алдынлы ерлеге ес болгъан охувчулар ортакъчылыкъ этдилер.

 Арив безендирилген залдагъы сагьнаны тёр тамына илинген: «Инчесаниятны сигьрулу дюнья­сы гьар даим яшасын!» – деген чакъырыв сёзлер яшланы пагьмуларыны, гьюнерлерини ажайып дюньясына залны толтургъан къаравчуланы да чомулма гьазирлейгендей гёрюне. Байрам концерт­ни гьайрангъа къужурлу программасын оьзлер де инчесаният школаны охувчулары Сабина Алибекова ва Магьаммат Алиев бажарывлу кюйде юрютдюлер.

Инчесаният школада тарбияланагъан яшланы хор бёлюгю муаллими Эдилхан Казимов да булан сагьнада тизилип шаир В.Костровну сёзлерине, Л. Квинтни макъамына язылгъан «Салам, дюнья» деген йырны оьтесиз таъсирли йырладылар. «Мени Ватаным» деген экинчи йырны да яшлар къарны-гёнгю булан, тазза дегенче юреклеге сингдирип айтдылар.

2023-нчю йыл Россияны Президенти В.Путинни къарары булан халкъ шаир Расул Гьамзатовну йылы деп билдирилген. Апрель айда Магьачкъалада шаирни 100 йыллыгъына багъыш­ланып «Театральная мозаика» деген ат булан оьтгерилген конкурсда Сабина Буттаева, Сайида Гьадисова ва Сабина Алибекова уьст болуп, оьр савгъат къазангъанлар. Эсгерилген охувчулар сагьнада къужурлу программасыны бир гесегин гёрсетген сонг, олагъа хас дипломлар тапшурулду.

Инчесаният школаны Халимбекавулдагъы бё­лю-гюню охувчулары муаллими Рапуля Аликберова онгаргъан «Къазикъумукъ бийивню» къурч кюйде бийип, къаравчуланы харс урувларын къазанды. Кёп-кёп халкъара конкурсланы лауреаты болуп, къаравчуланы да сюювюн къазангъан агъач къашыкълар булан оюнлар, бийивлер салып къаравчуланы гьайрангъа къалдырагъан «Задоринка» деген ансамблни чыгъышлары айрыча таъсирли бола. Бу гезик де оланы ёлбашчысы Любовь Абуева гьазирлеген «Орус бийивю» оьтесиз къужурлу эди.

Къумукъ халкъны милли алаты саналагъан агъачкъомузну къылларын чарнатагъан, Дагъыстанны халкъ артисти Руслан Загьировну ёлбашчылыгъы булан къомуз согъагъан яшланы «Зенгли къыллар» деген ансамбли де гьюнерлерин малим этди. Э.Казимов ва Г.Алиева уьйретеген «Энемжая» деген яшланы хору къумукъ тилде «Ватаным» деген йырны балын-гюлюн чыгъарып, оьтесиз таъсирли йырладылар.

Шондан сонг инчесаният школаны хали-халча, тастар сокъма, опуракъ тикме ва оьзге тюрлю касбулагъа уьйретеген бёлюк­лерине юрюйген яшлар да, бирини-артындан бири сагьнагъа чыгъып, оьзлени бажарывлугъун, усталыгъын гёрсетдилер.

Муаллимлер, бир нече конкурсланы дипломларына лайыкълы болгъан Асгьабгьажи Абакаров, къумукъ аргъан согъувну устасы, яш муаллим Батырхан Казимов, муаллимлени «Къумукъ тюзлер» деген ансамблини ортакъчылары милли алатланы согъуп гёрсетген кюйлер тынглавчуланы тазза дегенлей къурчун къандырды.

Байрамбек Абакаров онгарып яшлар булан салгъан леззетли къумукъ бийивден сонг, байрамны ортакъчылары бары да сагьнагъа гётерилип, «Биз сизге насип ёрайбыз!» деген йырны алышып айтдылар.

Ахырында Буйнакск районну маданият бё­лю­гюню ёлбашчысы Р.Ира­зутдинова булай арив байрамны гьазирлеген муаллимлени, пагьмулу яшланы, оланы ата-аналарыны атына гьакъ юрегинден баракалла билдирди ва гележекде де охувчу яшланы инчесаниятны сигьрулу дюньясындан айрылма къоймай, пагьмуларын ачып, артдырып иш юрютмеге чакъыр­ды. Шону булан бирге инчесаният школаны бит­диреген яшланы бир бёлюгюне шагьатнамалар ва грамоталар тапшурду.