Къаягент районда кюйде гьар тюрлю гьаракатлагъа гёнгюллю гьаракатчылар пайдалы ишлери булан савлай республикада да генг белгили. Аслу гьалда яшёрюмлерден къурулгъан бу бёлюк 2017-нчи йылдан берли иш гёре. Яш наслуну яхшы къылыкълагъа уьйретив, бош вакътисинде оланы ял алывун пайдалы кюйде оьтгерив, элибизге пайдалы адамлар этип тарбиялав бугюнлерде шо отрядны алдында токътагъан баш масъала болуп токътай. Шо ишлени гёнгюллю кёмекчилер аслу гьалда дарслардан бош заманында гьакъ юрекден юрютелер.

– Лап башда биз оланы оьзюбюз излеп табадыкъ, – дей бизин булангъы лакъырында яшланы ва яшлары бар агьлюлени уьйлерине барып къуллукъларын кютеген бёлюкню заведующийи Зулейра Магьамматовна Азизова. – Гьали олар оьзлер бизин табалар.
Арадан оьтген йылланы ичинде гёнгюллю отрядны ишине 120 яш къуршалгъан. Бугюн оланы пайдалы ишлерин Первомайскоеде, Гергада, Гьюсемегентде, Янгыкъаягентде яшайгъан 49 оьрюм чагъындагъы яш давам эте. Гьариси юрютген чаралар, оьтгерген сагьатлары оланы загьмат книжкаларында язылгъан. Сонг да, оланы гьариси ДОБРО.РУ деген сайтда белгиленген.

Гёнгюллюлени гьаракаты 20-дан да артыкъ тармакъларда гьис этиле. Шоланы арасында эсли адамлагъа, авруйгъан яшлагъа кёмеклешив, спорт, маданият чараларда къуллукъларын кютювде ортакъчылыкъ этив бар.

Сонг да, «Уьстюнлюкню волонтёрлары», «Конституцияны волонтёр-лары» деген гьаракатлар Уллу Уьстюнлюкню байрам гюнюне, Конституцияны гюнюне багъышлангъан. Район, республика даража-сындагъы гьар тюрлю чараланы оьтгеривде де шо гёнгюллюлер актив кюйде ортакъчылыкъ этелер.

Зулейраны айтывуна гёре, бёлюкге къуршалгъан гёнгюллюлер Рамазан айда, Янгы йылны байрам гюнлеринде юрюлеген гьар тюрлю ишлерде де ягъада къалмайлар. Уланъяшлар тамазаланы абзарларында этилеген ишлеге кёмек къолун узаталар: сув ташыйлар, нас агъымлар йиберилеген татавулланы тындырыкълы тазалайлар, наслыкъланы жыйып чёплюклеге етишдирелер. Бир-бир гезиклерде: акъчабывда, сырлавда да къошумун болдуралар. Олардан къызъяшлар да бир де артда къалмай чалышалар. Къызлар абзар-уьйде тазалыкъ болдуралар, опуракъланы, терезелени, савут-сабаланы жувуп, къурутуп ерли-ерине ерлешдирелер.

– Гьар тюрлю себеплер болуп бизден тайып гетген уланлар ва къызлар баргъан ерлеринде де шо адилли ишлерин, инсаплы гьаракатын унутмай давам этелер. Мисал учун, Сабина Абдулкеримова оьзю бугюн охуйгъан Чебоксары шагьардагъы медицина коллежни шолай отрядыны ёлбашчысыны заместители гьисапда иш гёре.

Волонтёрланы бёлюгюнде бир-бир агьлюлени 2–3 вакили ортакъчылыкъ эте. Шихалиевлени, Гьажиарслановланы, Гьамитовланы, Пашаевлени, Идрисовланы, Адаевлени атларын кёп сююп айтаман, – дей Зулейра Азизова. – Оланы гьариси оьтгерилеген бары да пайдалы ишлени жагьлы ортакъчылары гьисапда белгили. Артдагъы йылларда волонтёрлар Рамазан айда айрыча кёп иш эте. Ораза ачмагъа ювукъ болгъанда машин ёлгъа чыгъып сувлар пайлав аслу гьалда оланы гючю булан юрюлюп турду.
Къаягент районлу жагьил уланлар ва къызъяшлар оьтгереген пайдалы ишлерини вакътисинде оьзлер де тарбияланалар, янгы къурдашлар, адамлар булан аралыкъ тутувну ёлларын табалар, сынав ­топлайлар. Олар арымай-талмай юрютеген пайдалы ишлени республиканы, районну гьакимият къурумла да эсы этелер яшлагъа баракалла кагъызлар язалар. Натижада этилеген ишлер эки де якъны, бизин барыбызны да бек къувандыра.

БИЗИН МАЪЛУМАТ: Зулейра Магьамматовна АЗИЗОВА социал тармакъгъа Дагъыстан пачалыкъ педагогика университетни охуп битдирген сонг гелген. Шо тармакъда 20 йылдан артыкъ чалыша. Ол – оьрдаражалы касбучу, бёлюкню заведующийи.