Уьстюнлюкню гюню арекге-тарихге гетген сайын, яш наслуну патриот ругьда тарбиялавда Уьстюнлюкню байрамыны агьамиятлыгъы уллу. Бизге Уьстюнлюкню гелтиргенлер йылдан-йыл аз бола, тек оланы немец фашистлер булангъы къыргъын давда гёрсетген къоччакълыгъы ва игитлиги унутулмагъан ва унутулмай да къалажакъ.

Уллу Ватан давну игитлерини яшларыны яшлары бугюн Украинада юрюлюп турагъан хас дав гьаракатда Россияны йыракъдагъы дазуларын янгы миллетчилерден къоруп сакълавда игит кюйде ябушалар. Уьстюнлюкню гюнюню алдында Къоркъмаскъаладагъы Магьаммат-Загьир Баймурзаевни атындагъы школаны муаллимлери Уьстюнлюкню гюнюне багъышлангъан чаралагъа Украинадагъы Хас дав гьаракатда ортакъчылыкъ этип, яраланып къайтгъан къоччакъ уланлар: Къоркъмаскъаладан — Арсен Алиев ва Назир Сахаватовну, Алмалыдан — Ибрагьим Алиевни чакъыргъан эди. Школаны тарихден дарс береген муаллими Юлдуз Магьаматова ва школаны директоруну тарбиялав ишлеге къарайгъан заместители Наида Арсланбекова 8-нчи класны охувчулары булан онгаргъан «Къоччакълыкъны дарсына» Украина дав хас гьаракатны ортакъчыларындан къайры Хумторкъали районда яшёрюмлени политикасына къарайгъан Жамалутдин Закарьяев, журналист ва шаир Жават Закавов да чакъырылгъан эдилер.

Украина дав хас гьаракатны ортакъчылары бизин дагъыстанлы уланлар дав хас гьаракатда нечик къоччакъ кюйде ябушагъаны гьакъда хабарлады. Журналист ва шаир Жават Закавов давну темасына багъышлангъан шиърусу охуду. 8-нчи класны охувчулары оьзлер де давну темасына багъышлангъан орус шаирлени шиъруларын чебер кюйде охудулар. Школаны тарихден дарс береген муаллими Юлдуз Магьаматованы совет солдатлар Уллу Ватан давда гёрсетген къоччакълыкълары ва игитликлери гьакъындагъы хабарларына яшлар иштагьлыкъ булан тынгладылар. «Къоччакълыкъны дарслары» оьсюп гелеген яш наслуну патриот ругьда тарбиялавда уллу роль ойнай.

 Суратда: Эсделикге чыгъаргъан сурат