Бабаюрт район

Дагъыстанны Халкъ Жыйыныны Бабаюртдан чыкъгъан депутаты, райондагъы социальный фондну ёлбашчысы Абдулла Магьамматов гёнгюллю кюйде хас асгер гьаракатда ортакъчылыкъ эте. Алдындагъы гюнлерде ол къысгъа болжалгъа уьюне гелди ва ону Дагъыстанны Башчысы Сергей Меликов къабул этди.

Абдулла Магьамматов – Дагъыстанны Халкъ Жыйыныны савлукъ сакълавгъа, загьматгъа ва яшавлукъ политикагъа къарайгъан комитетини ортакъчысы ва 4 яшны атасы. Шогъар да къарамай, ол 6 ай алда хас гьаракатда ортакъчылыкъ этмек учун гёнгюллю кюйде Донбас бойгъа гетген эди.
–Хас асгер гьаракатда ортакъчылыкъ этмегигиз булан сиз герти дагъыстан намусну гёрсетдигиз ва аталаны антына амин экенигизни билдирдигиз, – дей С.Меликов огъар Амет-Хан Солтанны медалын тапшура туруп. –Шу пачалыкъ савгъат да сизин йимиклеге берилме герек. Сизин игитлигигиз – оьсюп гелеген яшёрюмлеге герти уьлгю.

А. Магьамматов оьзю буссагьатда 71-нчи мотострелковый полкда къуллукъ этегенни, дагъыстанлы яшлар бир де бюдюремей, тартынмай дав агьвалатларда къоччакълыкъ гёрсетегенни ва бары да зат етишегенни гьакъында хабарлады.

–Мени булан Запорожскиде кёп дагъыстанлы яшлар бар, олар сиз оьзлеге кёмек этегенигиз учун баракалла айтмакъны тилеген, – дей А.Магьамматов. – Сиз де, Парламентни ёлбашчысы Завур Аскендеров да мени булан гьар гюн дегенлей байлавлукъдасыз, къайсы масъаланы да чечме гьазирсиз, шо бизге гюч бере. Сизин биз уьстюнлюк булан къайтажакъгъа инандырма сюебиз.
Шо гюн Дагъыстанны Халкъ Жыйыныны ёлбашчысы Завур Аскендеров да депутат булан ёлукъду ва огъар къуллукъ этеген еринде тарыкълы болагъан машинни ачгъычларын тапшурду.

Хасавюрт район

Районда язлыкъ чачывланы къызгъын вакътиси. Яхсайдагъы «Гранит» деген хозяйство – районда чы нечик де, республикада да инг де уллу хозяйстволаны бириси. Мунда гьар тюрлю оьсюмлюклер чачыла. Бираз алда хозяйствону гьакъында НТВ канал маълумат алып гетди. Дагъыстанны юрт хозяйство ва сурсат министрни 1-нчи орунбасары Ш.Шарипов да бу хозяйствону ишине оьр багьа берди.

–Гьар йыл хозяйство 2500 гектар ерге гюзлюклер чача, – дей ёлбашчысы Атилла Гереев. – Бу йыл язлыкъланы да 190 гектаргъа чачма сюебиз. Язлыкъ арпаны янгы техника ва янгы къайда булан чачагъаныкъ – бешинчи йыл, харж аз гетеген шо чачывдан яхшы гелим алма ва токътайгъан багьасын да аз этме имканлыкъ бола.

Гертиден де, хозяйствода чачывлар янгы кюйде юрюле. Чачыв булан бирге азыкъландырыв да оьтгериле. Шо къайда топуракъны оьр даражада къоллайгъанлагъа пайдалы. Дагъыстанны юрт хозяйство ва сурсат министерлиги шу къайданы республикада генг кюйде къолламакъны яны экенни де билдирген.

Къарабудагъгент район

«Къоркъунчсуз ва сан янлы» деген программагъа гёре районда кёп иш этилип тура. Бугюнлерде «Урма-Губден» деген ёлну 16-нчы чакъырымындан башланып, мукъаятлы къайдада асфальт салына.

Район администрацияны прес-къуллугъу билдиреген кюйде, бу ёл – тав районну юртларын тюзлюкдеги шагьарлар ва юртлар булан байлавлукъ юрютме имканлыкъ бере. Ёллар яхшы буса, яшавлукъ гьаллар къолайлашагъаны ва экономиканы оьсювю болдурулагъаны да белгили. Гьар гюн ёллар къурувгъа 30-дан да артыкъ хас техника къуршала.

Къурувчулар билдиреген кюйде, ёлну бу йылгъа гёрсетилген 14 чакъырымы июн айда ишге гийирилежек.

Буйнакск район

Ахырынчы оьтгерилген жыйында районну башчысыны ишлерин кютеген Уллубий Ханмурзаев тюрлю-тюрлю масъалаланы арагъа салды.

Яшланы асгерге чакъырыв башлангъаны ва шо жаваплы ишни нечик оьтгерилежекни гьакъында Буйнакск шагьарны ва Буйнакск районну военный комиссары Гьайдар Зульпукъаров сёйледи ва асгерге чакъыры-лагъанлар хас асгер гьаракатда ортакъчылыкъ этмежегин де билдирди.
Зараллы жанлагъа къаршы юрюлеген ишлени ва чачывланы гьалы гьакъда юрт хозяйство управлениени ёлбашчысы Магьаммат Гьажимурзаев, туристлени къабул этивге гёре юрюлеген ишлени гьакъында яшёрюмлени ишлерине ва туризмге къарайгъан бёлюкню ёлбашчысы Абдурагьим Ойболатов да гьисап бердилер.

Жыйынны ахырында районну маданият управлениесини ёлбашчысы Рукъуят Устарханова-Иразутдиновагъа ва «Оьзденлер» деген халкъ хоруна Дагъыстанны Гьукуматыны Гьюрметлев грамоталары тапшурулду.

Къызылюрт район

Март айны ахырынчы гюнюнде оьтгерилген жыйында районну башчысы Рустам Татарханов Солтанянгыюрт, Кировавул ва Миятлы юртланы генглешдирив, топуракълар нечик къолланагъан, къурулуш ишлерде не кемчиликлер ёлугъагъан масъалаланы арагъа салды.

Архитектура ва къурулуш бёлюкню ёлбашчысы Рустам Сулейманов, топуракъгъа, мюлк аралыкълагъа ва муниципал тергевге къарайгъан бёлюкню башчысы Тошайхан Къурбаналиев, ихтиярланы якълайгъан бёлюкню ёлбашчысы Тимур Ханмурзаев ва Солтанянгыюртну башчысы Арзулум Шамхалов гётерилген масъалагъа гёре оьзлени ойларын айтдылар.

–Озокъда, бары да ишлер халкъ учун онгайлыкълар болдурувдан башланма герек, – деди Р.Татарханов. – Шону учун да эсгерилген масъалалар юртну генеральный планын бузмайгъан кюйде юрюлме герек.

Солтанянгыюртда этилме герек ишлени гьакъында юртну башчысы айтды. Бираз алда юртда адамлагъа ял алмакъ учун парк ачылгъан ва шогъар да хас асгер гьаракатда ортакъчылыкъ этген, оьлгенден сонг Къоччакълыкъны ордени булан савгъатлангъан Магьаммат Сотавовну аты къоюлгъан.

Хумторкъали район

Сыйлы болгъан Рамазан ай давам этиле. Гьали оразаны яртысы да гетип тура. Тюрлю-тюрлю районларда жамият жыйылып оразасын бирче ачагъан гезиклер кёп болуп тура. Шолай саваплы иш Хумторкъали районда «Сарихум» деген залда оьтгерилген.

Юртну жамаатыны алдында сёйлеген имам Садрутдин-гьажи бу айны даражасы гьакъда бирдагъы да айтгъан ва бир-биревге бакъгъан оьчлюкню тайдырып, татувлукъну яны болмагъа чакъыргъан.
Ораза ачывгъа багъышлангъан мажлисни оьтгерме оьзюню бойнуна алгъан районну башчысы Айнутдин Зиявдинов да адамланы бир-бирев булан татувлу болмакъны ва къалгъан хатирлени де гечмекни эсгерген. Рамазан айны ичинде дагъы да саваплы ишлер этме гёз алгъа тутулгъанны айтгъан.

Ахшамгъы намаздан сонг районну тюрлю-тюрлю юртларындан гелгенлер демли столланы артында аш хапгъан ва дуаларыны артындан дюньягъа парахатлыкъ ёрагъан.

Къаягент район

Дагъыстанны Халкъ Жыйыныны депутаты Мурат Исмайылов, «Бирикген Россия» деген партияны ва Пачалыкъ Думаны депутатыны вакиллери районда ватандашланы къабул этген.

Аслу гьалда районлуланы гёчювюл гьайванчылыкъ булан машгъуллулар турагъан топуракъланы ерли муниципалитетлеге чыгъарывну, Къаягентдеги больницаны къурулушун битдиривню, Къаягент агъачлыкъ къырылагъанны, Герга юртда яшлар баву ёкъну, Къаранайавулда ГУП-ланы топуракъ-ларындан яшавлукъ уьйлер этмек учун ерлер гёрсетив масъалалар талчыкъдыра.
Шолай да, гелгенлер, юртда спорт идаралар къурмакъны, далапчылыкъ юрютмек учун ер бермекни ва ГУП-ланы масъалаларын гётердилер.

Бары да масъалалар къабул этилди. Тезде барына да къаралажакъ ва бириси де тергевсюз къалмажакъ.