Оьтген жумагюн, март айны 31-нде, белгили художник-скульптор Элбрус Къадиев бизин редакцияда къонакълыкъда болду. Баш редакторну кабинетинде агьамиятлы лакъыр юрюлдю.

Аслусу – Э. Къадиев Россияны Игити Абдулгьаким Исмайыловну эсделик ­бюстун этме бойнуна алгъан. Шогъар байлавлу оьзю ишлейген ва яшайгъан Санкт-Петербургдан гелип-гетип сёйлешивлер, гьакълашывлар юрютюп, дыгъарлар байлап, документлер гьазирлеп юрюйгенли уьч ай бола. Игитибизни юртундан, айланадагъы юртлардан, район администрациядан тийишли болагъан кагъызланы ва оьзге тарыкълы документлени де гьазирлеп битген.
Лакъырыбызны барышында ол:

–Игитибизни юртунда, – Чагъаротарда болдум,–дей. – Оьзю яшагъан уьйге бардым, къардашлары, юртлулары булан лакъыр этдим, охугъан школасына, Яхсайдагъы школагъа, къабуруна бардым. Булай ёлугъувлар магъа Игитни хасиятын, бет-келпетин яратмакъ учун бек тарыкълы.

Ону бюстун Магьачкъалада оьзюню аты къоюлгъан орамны бир боюна салма ­таклиф этген эди. Олар айтагъан ерге барып къарадым. Арив гёрмедим. Чёп ташланагъан ер. Орам оьзю де чет ерде. Ким баражакъ, ким къаражакъ, гёрежек? Оьзюмню пикрумну айтдым. Шагьарны гьакимияты дагъы да эки ерни таклиф этди. Бириси – комсомолну атындагъы паркда, Игитлени аллеясы. Бирдагъысы – Магьачкъаланы баш майданыны къырыйындагъы парк. Шонда Фазу Алиеваны эсделиги де бар. Гьалиге салагъан ери булан токъташып битмегенбиз. Бу айланышларымда магъа милли политикагъа къарай­гъан министр Энрик Муслимов, Магьачкъаланы мэрини биринчи заместители Нариман Темуркъаев яхшы кёмек эте, гьайлы янаша.

Белгили экени йимик, баш редакторубуз Гебек Къонакъбиев Абдулгьаким Исмайыловну яшавуну, дав ёлларыны гьакъында «Байракъ къакъгъан Абдулгьаким» деген ат булан мукъаятлы китап язып чыгъаргъан. Шо китап орусча «Абдулхаким Исмаилов. Знамя над Рейхстагом» деген ат булан да чыкъгъан. Лакъырыбызны вакътисинде де ол Абдулгьаким Игитибизни дав ёлларыны гьакъында къужурлу мюгьлетлерин хабарлады.
–Мен китапны да охуп чыгъажакъман. Булай хабарлагъанынг да мени учун бек пайдалы,–деди Э. Къадиев.

Элбрус Жамалутдинович Яхсайда тувгъан. Школа ча­гъындан берли сурат этме башлагъан. Этген суратларын Москвагъа телевидениеге йибере болгъан. Яшлар учун берилиш юрютеген Валентина Леонтьева Элбрус йиберген суратланы кёп керенлер телевизордан да гёрсетген. Школаны битегенде буса ол класындагъы охувчуланы, оьзлеге дарс берген муаллимлени суратларын этип, олагъа савгъат гьисапда тапшургъан. Школаны битдирген сонг Ростов шагьарда Криковну атындагъы чебер училищеде охугъан. Гьар тюрлю ерлерде, Яхсайдагъы колхозда, Хасавюртдагъы приборлар этеген заводда художник болуп ишлеген сонг Санкт-Петербурггъа гёчген. Отуз йылдан да артыкъ заманны ичинде мунда яшай ва ишлей. Оьзюню устаханасы бар. Ол дагъы да агъачны оюп, ташны чарлап чебер суратлар да эте. Уланы Камал Къадиев –бизнесмен. Иши булан янаша артист гьисапда беш чебер фильм­де ойнагъан.
Элбрус Къадиевни Игитибиз Абдулгьаким Исмайыловну бюстун Уьстюнлюкню гюнюне этип битдирме умуту бар. Бизге де, гьаракатгъа– берекет, деп айтмакъ къала.