Кюреге – кимге де пайдалы емиш. Айрокъда уллу чагъына етишгенлер учун. Кюрегени къуругъаны яда янгы бишгени башгъа тюгюл, оланы къайсы да адамны савлугъуна бек таъсир эте.

Биринчилей, кюрегеде юреги, къантамурлары, бюйреклери авруйгъанлар учун тарыкълы калий элемент бар. Сонг да, ондагъы железа деген элемент адамны къаныны ишлевюне, янгыртывуна, олай да къаны азлагъа (анемия), витаминлер етишмейгенлеге бек кёмек эте. Дагъы да кюрегеде инсанланы къаркъарасына болмаса ярамайгъан магний, фосфор, А, В, С витаминлер бар.

Кюрегени ичиндеги магний адамны къанташывун (давление) ёрукълаш-дырагъандан къайры да, башмайыны ишлевюн, эсин яхшылаш-дырмакъ учун бек пайдалы. Олай да, къаркъарасына югъагъан аврувлагъа къаршы турмагъа кёмек эте. В группагъа гиреген витаминлер юрекге, юрек булан байлангъан къантамурланы ишлевюне бек пайдалы ва атересклероздан да сакълай.

С витамин буса ашкъазаныны, ичеклерини ишлевюне бек таъсир эте. Гьар гюн 100 грам кюреге ашасагъыз, ичеклеригизни ишлевю яхшы-лашажакъ, айрокъда ичи къатагъанлар, ел тыгъылагъанлар учун герекли.

Китайлыланы бырынгъы медицина къуллукъчулары кюрегени йымышакъ ерин яраланы сав этмек, ирин тутгъан ерин тазалап тайдырмакъ учун къоллай болгъанлар. Олай да, кюреге онкология аврувлар къатна-гъанланы савлугъун ­беклешдирмек учун да пайдалы.

Кюреге адамны терисине, чачларыны оьсювюне бек таъсир этегени юз йыллар булан яшавда сыналып гелген. Бырынгъылар къартайып гелеген терисине кюрегени йымышагъындан бетине с­юртме маска эте болгъанлар.

Масканы шулай этме боласыз: кюрегени ­уьстюндеги къабугъун тайдырып, йымышакъ ерин яхшы кюйде янчып, таза бетигизге шону сюртесиз ва 20 минутгъа къоясыз. Сонг йылы сув булан жувуп тайдырып, крем сюртмей къоясыз. Шону сиз бир жумада 3-4 керен этме боласыз.