Яшлагъа чечек яздырмагъа, вакцина этдирмеге герекни гьакъындагъы хабар юрюлегени нечакъы заман бола. Яшлагъа да тийишли прививкалар, вакцина этмесе ярамай деп касбучулар бир токътамай билдирелер. Тек кёбюсю ата-аналар шогъар къулакъасмагъа сюймейлер. Ата-аналар авлетлерине тарыкълы прививкаланы да этдирмеге сюймейбиз деп, агьлюсюндеги гиччипавланы савлугъуна да зарал гелтирмеге бола.

Мисал учун, гиччипавланы уллу къызардашларына, агъаларына прививка этилмеген буса, олагъа да къайдан буса да инфекция юкъмагъа бола. Бирлери шондан енгил, башгъалары авур кюйде гьаранбалагьгъа къутула. Сонг олар оьзлерден гиччилеге де, чагъына гёре вакцина этдирмеге ярамайгъанлагъа да юкъдура. Шо заман гиччинев яш я оьлмеге яда ону савлугъу шайлы заралланма имканлы. Шолай гьалдан къутулма бир ёл бар деп бизге Дагъыстанны савлукъ сакълав министерлигинден билдирди.

Совет Союзну заманларында йимик, гезигине гёре (Милли календаргъа) аврувланы алдын ала­гъан чечек язып, яшланы иммунитетин яхшы-лашдырмагъа герек. Вакцина этдиреген халкъ артгъан сайын, (коллектив-ный иммунитет) адамлар инфекциялар югъуп аврумажакъ эди. Биз де, бизин ата-аналарыбыз да йыллар булан шо къайданы къоллап гелген, шо саялы ­югъагъан дифтерия, оспа, корь, полиомиелит аврувлардан уьст геле эдик. Шолардан авруйгъанлар нагагь да болмай эди демеге ярай.

Гьали буса яшланы больницалары ­ къоркъунчлу аврувлар югъуп тюшген гиччипавлардан толгъан. Оланы ата-аналары къорумагъа къарама-гъан деп айтмагъа да ярай. Неге тюгюл, кёбюсю ата-аналар кюрчюсюз, себепсиз кюйде вакцинаны, прививканы гери уралар.

Коллектив иммунитетни гётермекни бек агьамияты бар. Неге тюгюл, медиклер бир-бир яшлагъа тюрлю-тюрлю аврувлары да, шоланы да узакълангъан тайпалары да бар деп токъташдырагъан справкалар берген. Шо саялы да олагъа вакцина этмеге ярамай. Тек шо тайпа яшлар, аврувлары да оьрчюгюп, бек авур кюйде авруйлар, оланы яшавуна да къоркъунчлукъ бар. Шо саялы да оланы савлугъун сакъламакъ учун прививкалар этдирмеге герек.
Кёбюсю ата-аналар динде яратмай деп яшларына чечек яздырма сюймей. 2021-нчи йылда Россияны бусурманларыны дин жы­йынында шону натижасын чыгъара туруп, себепсиз кюйде коронавирусгъа къаршы вакцинадан баш къачырыв гери урула деген къараргъа гелген.

Шонда: «Хыр туруп, вакцинаны бир себепсиз гери урмакъны ва шону гьакъында биревлеряягъан тарыкъсыз ялгъан хабарлагъа тынгламакъны динде къабул этилинмей. Гьалиге бизин гьукуматыбыз бары халкъгъа гьавайын халкъара оьр талаплагъа жавап береген вакцинаны этдирип тура. Оьзгелер де шондан пайдаланып, вакцина савлугъуна гёре ярай­гъанны яда ярамайгъанны врачлардан билип, оланы насигьатларына тергев берип, оьзюгюзге де, агьлюгюздегилеге де этдирсегиз яхшы болур эди», –деп айтыла Россияны бусурманларыны дин жыйынында къабул этилген къарарда.