Базар аралыкълар оьмюр сюреген девюрде экономиканы ва яшавну оьсювюнде далапчылыкъ гьаракатны гючлендиривге айрыча тергев бакъдырыла. Неге десегиз, базар экономиканы аслу шарты – орта даражасы булангъы адамланы ва къурумланы сыдраларын къолайлашдырыв.
Бугюнлерде «Дагестанская правда» газетни жыйынлар залында Дагъыстанда далапчылыкъ булан машгъул болагъанланы ихтиярларын якълайгъан вакили Мурат Далгьатовну прес-конференциясы болду.
Шонда оьл оьзюню баянында республикабызны маълумат къуралларыны къуллукъчуларын 2022-нчи йылда этилген ишлени натижалары булан таныш эте туруп, 2023-нчю йылгъа белгиленген борчланы гьакъында да айтды.
– Мени вакиллик къуллугъум гьакимликни ва далапчылыкъны арасындагъы байлавлукъланы беклешдирив ва бир-бирине инамлыкъны болдурув, – деп башлады оьзюню баянын Мурат Далгьатов. – Россияда бизин къуллукъ иш гёрмеге башлагъанлы арадан он йыл оьтдю. Шолай вакиллик къуллукъчу РФ-ни Президентини янында да иш гёре. Оьзюм де жаваплы къуллукъгъа ДР-ни Башчысы Сергей Меликовну таклифин къабул этип экинчи болжалгъа белгилендим. Тюзюн айтмагъа тарыкъ, гьалиги заманда далапчылыкъны оьсдюрюв оьтесиз четим шартларда юрюле. Айлана якъдагъы аврувлар, санкциялар, дав агьвалатлар, багьаланы артып тербейгени далапчылыкъны оьсювюне чатакъ сала. Натижада, бизде кёмек ахтарып оьзлени ихтиярларын якълагъанны сююп дегенлей арзалар кем болмай. Мисал учун айтсакъ, 2022-нчи йылда 1300-ге ювукъ билдирив болду. Шоланы 120- сына ювугъу оьз ишине чатакъ салагъанланланы уьстюнден арз этилип гелген эди. Муна шо саялы да бизге прокуратура ва судлар булан байлавлукъда иш гёрмеге тюше. Харж булангъы къуллукъларына байлавлу пачалыкъ аманат касны янындан гьар тюрлю онгайлы къайдалары пайдаландырыла.
Гьалиги заманда, дагъы да ачыкъ этип айтсакъ, 2019-нчу йылдан тутуп далапчылыкъ булан машгъул болагъанлагъа налогланы тёлевде ва шолай да субсидиялар булан кёмек этивде асувлу чаралар 2023-нчю йылда да узатылажакъ.
Гележекде далапчылыкъ булан машгъул болагъанлагъа производствосун генглеширип янгы иш ерлер ачмагъа имканлыкълар кёп болсун учун федерал, регион ва ерли оьлчевлерде оьтгерилеген тергевлер токътатылгъаны (мараторий) гьакъда да айрыча эсгермеге тюше.
Далапчылыкъ булан машгъул болагъан тайпаланы топуракъ пайлар булан конкурслагъа къошмай оьтгерив де гьакимлик къурумланы янындан якъланажакъ.
Шолайлыкъда, экономианы яшыртгъын тармагъына бойсынагъанлагъа да ёл берилмейгени де англашыла.
