Гюч де, исив де береген къуллукъ
Россияда энергетиклени гюню агьамиятлы тармакъда чалышагъан къуллукъчуланы касбу байрамы гьисапда йылны ичиндеги лап да къысгъа болжалы булан белгили, декабр айны 22-нчи гюнюнде оьтгериле. Шогъар байлавлу болуп 1966-нчы йылда СССР-ни Оьр Советини Президимуну къарары да 22-нчи декабрде Россияны бютюнлей электрификациялашдырывну Пачалыкъ планыны (ГОЭЛРО) гьюрметине чыгъарыла.
Оьтген асруну 80-нчи йылларында энергетиклени касбу байрамы къаттыгюнге рас гелсин учун алышдырылып, эсгерилген айны уьчюню къаттыгюню белгилене. Тек къаттыгюнге деп токъташдырылгъан байрам энергетиклени янындан якъланмай, алда йимик декабрни 22-нчи гюнюнде юрюлюп тура…
Шону гьисапгъа алып, 2015-нчи йылда декабр айны 21-нде Россияны Гьукуматыны къарары булан байрам гюн алдагъы ерине къайтарыла. Шо гюн электрик гюч ва исив береген бары да ТЭЦ-лени ва ГЭС-лени, АЭС-лени къуллукъчулары йимик, эсгерилген тармакъ учун кадрлар-касбучулар гьазирлейген оьр ва орта хас билим береген ожакъланы студентлери де байрам чараларда ортакъчылыгъын болдура.
Адатлангъан кюйде, шо гюн лап да лайыкълы энергетиклер айрыча гьюрметлене, олар материал ва ругь якъдан иштагьландырыла. Дагъыстандагъы ГЭС-лер бугюнлерде Темиркъазыкъ Кавказ федерал округуну «Русгидро» бёлюгюню къанатыны тюбюнде иш гёрегени гьакъда айрыча эсгермеге тюше.
Совет Союзну заманында бизин уьлкебиздеги бары да энергетиклени ва студентлени умуми гьаракаты булан гёрмекли Чиркей ГЭС 20 йылны ичинде къурулду. Пайдаландырывгъа берилген гюнюнден гьалиге ерли Дагъыстанда миллиард киловатлар булангъы оьлчевде электрик гюч болдурулгъан ва къоллавчуланы пайдаларына йиберилген.
Яшырмагъа тарыкъ болмай, гьалиден хыйлы йыллар алъякъда къурулуп пайдаландырывгъа берилген электрик станцияларда ва болдурулгъан электрик токну пайлайгъан ерлерде, къураллар, теллер къоллав болжаллары битгени саялы, янгыртмаса бажарылмай. Шону учун гележекге байлавлу болуп къоллавчуланы талапларын кютювде ишлени оьлчевлерин ва сан янын артдырывгъа тергев гючлене, пачалыкъны янындан ломай харжлар айырыла.
Муна шо саялы да, къыш айларда къоллавчуланы талапларыны артагъанын гьисапгъа алып, яшавлукъ-экономика къуллукъланы камиллешдиривге айырылагъан акъча маяланы тёкмей-чачмай асувлу кюйде къолламаса, ер-ерде заман-заман тувулунагъан къыставуллу гьалланы алдын алыв четимлеше.
Суратда: РусГидрону дагъыстан бёлюгюню коллективи – Чиркей ГЭС-де юбилей байрам шатлыкъларда.
