Декабр айны 12-синде Интернетде ерлешдирилген видеороликде эргиши спортзалда эки гьакъылбалыкъ болмагъан яшланы токъалай. Токъалай дегенде, бир нече керен шайлы къапаслар бере. Шо агьвалат бизин школаланы бирисинде болгъанын англама къыйын тюгюл.
Шондан сонг электрон майданчаларда башлангъан къувун-пелекетни айтып битдирме къыйын. Дагъыстанны билим берив министерлиги алгъасавлу кюйде оьтгерген тергевлеге гёре, шо агьвалат Ахты юртдагъы 2 номерли школасында болгъан. Сынавлу педагог М. Талханов физкультурадан дарсны юрютеген вакътиси. Неге ол онча да къазаплангъанын, яшлар не этгенин, не айтгъанын гьалиге бир ерде де билдирилмей. Тек бугюнлерде муаллимге атылагъан чакъы сёз окъланы эби-баву ёкъ.
Амма мен натижалар чыгъармагъа алгъасамас эдим. Къайсыбыз школада охумагъанбыз, муаллимлерибизден «айып» алмагъанбыз. Уьлкебизде лап тарыкълы касбуланы бирисин абурдан тюшюрювню гьаракаты тезден башлангъан ва гьали де узатылып тура. Гелигиз, тергевлени натижалары битгенче сабур кюйде турма къарайыкъ.
