Декабр айны 15-нде «Дагестанская правда» газетни редакциясында Дагъыстан Республиканы экологиясыны ва табиат байлыкъларыны министри Ибрагьим Ибрагьимов журналистлер булан прес-конференция оьтгерди.

Аслу гьалда министр Дагъыстанда гелеген йылда къурулмагъа гёз алгъа тутулгъан чёплени ишлетеген заводланы гьакъында сёйледи. Ону айтывуна гёре бизин республикада йылны ичинде 1, 2 миллион тон чёп-чёпюре жыйыла Чёплени ишлетеген заводлар Дербент, Хасавюрт, Къарабудагъгент районларда ва Магьачкъала шагьарны ювугъунда къурулажакъ. Заводланы къырыйында чёпню геллирип тёгеген полигонлар да болмагъа герек.

Заводланы ишини натижасында иш ерлер, ва тюрлю маллар болдурулмагъа гёз алгъа тутулгъан. Эсгерилген заводлар 2024-нчю йылны ахырында къурулуп битмеге герек.

Чёплюклени гьакъында айта туруп И. Ибрагьимов «Генеральная уборка» деген федерал программагъа гирип Магьачкъала, Каспийск, Хасавюрт, Буйнакск шагьарланы янындагъы чёплюклер тайдырылажагъан да эсгерди. Шо ишлер учун республиканы бюджетине 1 миллиард 50 миллион акъча маялар гёрсетилген.

Министр Дагъыстан Республикада ишлетилеген карьерлени гьакъында да эсгерди. Ону айтывуна гёре законсуз кюйде иш гёреген карьерлени иши токътатылгъан. Къалгъанлары бары да законлу кюйде иш гёре.