Базар аралыкъланы амалгъа геливюнде гьалиги заманда экономиканы оьсювюнде янгылыкълар аслу ерни тутагъаны англашыла.
Бугюнлерде регионну экономикасыны оьсювюнде янгы къайдаланы гьисапгъа алып иш гёрювден кёп зат гьасил болажакъ. Ондан къайры, республиканы экономикасын беклешдиривге байлавлу къурулгъан ва чалышагъан хас штабны генглешген жыйыны оьтгерилди.
– Базар аралыкъланы девюрюнде далапчылыкъны якълап янгы къайдаланы ахтарыв ва танглав янгы къайдаланы къоллав милли борчну яшавгъа чыгъарывда аслу ер тутагъаны белгили, – деди ДР-ни Гьукуматыны Председатели Абдулмуслим Абдулмуслимов. – Шону учун маълумат къуллукъланы камиллешдирив халкъ хозяйствону бары да тармакъларында заман талап этеген кюйде яшавгъа чыгъарылмаса бажарылмай.
– Бугюнлерде бизин республикабызда ерли муниципал къурулувларыны башчылары булан байлавлукъда маълумат экономиканы танглавгъа ва пайдаландырывгъа чаралар гёрюле, – деди оьзюню гьисап беривюнде жыйынны ортакъчыларына ДР-ни маълумат оьсюв министерлигини башчысы Юрий Гьамзатов. – Маълуматланы ахтарывда ва токъташдырывда алгъасавлукъгъа ёл бермейли, ерлердеги яшавлукъ-экономика масъалаланы теренине тюшмеге герек бола. Агьамиятлы масъалагъа уьстденсув янашыв янгылышлагъа ёл ачагъаны ва экономиканы оьсювюне четимликлер тувдурагъаны гьакъда унутмай иш гёрмек – заманны талабы.
Белгили болгъан кюйде, экономиканы оьсювюнде электрон къайдалар 19 иш юрютюв къурумларда, 52 муниципал къурулувларында пайдаландырыла. «Пачалыкъ къуллукълар» деген онгайлы электрон имканлыкъларында да гьар тюрлю 89 къуллукълар ерлешдирилген. Шолар 84 къоллавчуну яшавлукъ шартларын камиллешдирив булан тыгъыс кюйде байлавлу.
Шолай онгайлы электрон къуллукълардан бу йылгъа гёз алгъа тутулгъан кюйде къоллавчуланы 30 проценти пайдаланмагъа герек болгъан. Гьакъыкъатда буса бугюн шо 20 процентге тюгюл яшавгъа чыгъарылмагъан. Демек, къоллавчуланы санавун артдырмакъ учун бар къуллукъланы сан янын токъташдырывдан гьасил болагъаны гьакъда унутма тюшмей. Шону учун электрон къуллукъланы генг кюйде пайдаландырывда маълумат къураллары да гёрмекли ерни тута.
