Ватанны Игитлерин сыйлайгъан гюн: Абдулгьаким Исмайылов

2007-нчи йылдан берли гьар йыл 9-нчу декабрде Ватанны Игитлерини гюню оьтгериле. Шо байрамны тарихи 250 йыл артгъа элте буса да, гьалиги Россияда оьтгерилегени 15 йыл бола. Тарихи терен буса да, маънасы бир кюйде сакълангъан: байрам гюн дав агьвалатларда яда ватандашлыкъ ишинде гёрсетген къоччакълыгъы учун Игит ат алгъанлар сыйлана.

Шо гюн Совет Союзну, Россияны Игитлерине, Сыйлы Георгийни ва Макътавлукъну орденлерини толу кавалерлерине пачалыкъны ва жамиятны янындан сый ва абур этиле. Шолай абур этилеген адамланы арасында кёп санавдагъы къумукълар да бар.

Россияны Игити Абдулгьаким ИСМАЙЫЛОВ –1945-нчи йылда Рейхстагны тёбесине Къызыл байракъ къакъгъанланы ва арадан 51 йыл гетип, Алтын Юлдуз ва Россияны Игити деген оьр ат берилгенлени бириси. Абдулгьаким Къызыл Армияны сыдраларына 1939-нчу йылда чакъырылгъан. Финлер булангъы давну ортакъчысы. Давну биринчи гюнлеринден тутуп, немислер булан бетге-бет туруп дав этген. Яралангъанда ол Ленинградгъа йибериле ва эки йылгъа ювукъ шагьарны сакълап дав эте. Ленинград къамавдан чыкъгъандан сонг, ону Темиркъазыкъ Кавказдагъы давгъа бакъдыра. Шондан Берлинге ерли яяв аякъдан баргъан Абдулгьаким айтып битдирмесдей къоччакълыкъ гёрсетген. «Къоччакълыгъы учун», «Ленинградны якълагъаны учун» деген медаллар, эки керен Дав Къызыл Байракъ, Макътавлукъну III даражалы, Уллу Ватан давну I даражалы орденлери булан савгъатлангъан. Давда гёрсетген къоччакълыгъы учун Россияны Игити деген сыйлы ат берилген.
Абдулгьаким Исмайылов 2010-нчу йылда гечинген ва Чагъаротарда гёмюлген. Игитни аты кёбюсю къумукъ юртланы, Хасавюрт ва Магьачкъала шагьарланы орамларына, шолай да Чагъаротардагъы, Хасавюртдагъы ва Магьачкъаладагъы школалагъа тагъылгъан.