Шагьризат АДИЛГЕРЕЕВА бырынгъы Таргъу юртда тувгъан ва шондагъы орта школаны битдирген. Бухгалтерлер гьазирлейген орта-хас техникумну тамамлагъан сонг къурулуш къурумларда ишлеп тургъан. Шо касбусун бугюнлерде де юрюте.
Шагьризат яшдан берли шиърулар яза, тек шоланы гьали печатгъа берме токъташгъан. Яш йылларыбызда шиърулар биз къайсыбыз да язабыз, тек артын узатмайбыз. Шагьризат буса бугюнлерде де яза. Аслу гьалда ону шиърулары ата-анагъа, табиятгъа, дослукъгъа, адамланы аралыкъларына багъышлана.
Шагьризат АДИЛГЕРЕЕВА
Къурдашлар кёп болмай
Къурдашлар тюрлю-тюрлю…
Бири сагъа бек тынглай…
Бола кёп асылы да,
Бири айтгъандокъ англай.
Бириси ювукъ бола,
Юрегингни толтуруп
Хабарлама сюесен,
Ялкъмай, безмей олтуруп.
Юрегингни ачмагъа
Олай къурдаш бек тарыкъ.
Ёраву ярыкъ йимик,
Бети де бола ярыкъ.
Герти ёлдаш янынгда,
Сен бай, ярлы бусанг да.
Яшавну кююн тапмай,
Ятгъа харлы бусанг да.
Кьурдашлагъа язаман
Шу сёзлени багъышлап.
Яшасынлар къурдашлар,
Бири-бирин алгъышлап.
Гьали кимге ошайман
Анам десем, чайкъала
Юрекдеги тамурум.
Янынгда болсун, анам,
Сени булан къабурум.
Ярыкъ эди сен барда,
Анам, мени гёзлерим.
Шатлыкъдан дагъы башгъа
Болмай эди сёзлерим.
Гюлю эдинг юрекни
Атир ийис береген.
Къызынг эдим мен сени
Нече де бек сюеген.
Йылай юрегим мени,
Токътап бир де къалмажакъ.
Сен ёкъгъа бу дюньяда
Насибим де болмажакъ.
Гече этдинг гюнюмню,
Сырдашым болду айым.
Сен ёкъ экенге мунда,
Бир затдан да ёкъ гьайым.
Сен гетдинг, азиз анам,
Къара болду явлугъум.
Болмадым жаным берип,
Гетди мени савлугъум.
Гюн де ёкъ магъа эртен,
Айым да чыкъмай энни.
Женнетни тёрюнде деп,
Маслагьат эте мени…
Татли сёзлер
Къызгъанма сен айтма татли сёзлени,
Олай сёзлер тарыкъ бола юрекге.
Аччы сёзлер ошай бузлу янгургъа,
Аралыкъны тебереген арекге.
Арив сёзлер аврувунга дармандай,
Гёнгюлюнг де чечек ачгъан ормандай.
Сындыргъандай емиш битген терекни,
Яман сёзлер гьасси эте юрекни.
Сагъа нече яман ишлер этсе де,
Огъар багъып яман гёзлер къаратма.
Бу дюньягъа заманлыкъгъа гелгенбиз,
О дюньягъа гетерингни унутма.
Шербет йимик татли сёзлер сёйлейик,
Юреклери жымчыкълардай къувнасын.
Гьар даим де ёра огъар яхшылыкъ,
Юрегинде яман ойлар тувмасын.
Айтылмасын, яман сёзлер сагъа да,
Демли сёзлер бал ютгъандай токъ этсин.
Арив сёзюнг болуп огъар дармандай,
Аврувларын къайтмас йимик ёкъ этсин.
Юрегинге гёре яша дюньяда,
Шолай этсенг ойлар, башынг оймажакъ.
Арив сёзлер бир-биревге айтайыкъ,
Юрек бир де татли сёзден тоймажакъ…
* * *
Дюньялар шавла берсин,
Гюл-чечеклер ачылсын.
Къумукъ халкъыма, Аллагь,
Насип уллу чачылсын.
Гелмесин яманлыкълар,
Тарыкъ тюгюл о бизге.
Яхшыны чакъыраман,
Яхшылыкъ гелсин сизге.
Яманны да унутуп,
Биз яхшыны англайыкъ.
Гьар заманда, я Аллагь,
Яхшылыкъгъа тынглайыкъ.
Аврумагъыз, талмагъыз…
Яман ойда къалмагъыз…
Шатлыкъдан толсун уьйлер,
Яшайгъан бизин кюйлер.
Юрекде сююнч болсун,
Пашманлыкълар чаймасын.
Яшланы шат тавушу
Уьйден бир де таймасын…
