Хумторкъали районну центры Къоркъмаскъалада Россияны Президенти Владимир Путинни бир гьавур асгер къуллукъгъа чакъырывун якълап юрт жамиятны митинги болду. Митингде районну юртларындан гелгенлер, районну къурумларыны ёлбашчылары, прокуратураны ва район полицияны къуллукъчулары, шолай да районну межитлерини дин чалышывчулары ортакъчылыкъ этди.
«Бирикген Россия» партияны политсоветини секретары Магьаммат Темирханов Украинада юрюлюп турагъан хас асгер операцияны якълайгъанны, В. Путинни бир гьавур асгер къуллукъгъа чакъырывун тюз гёрегенни гьакъында Россияны тарихинден мисаллар гелтирип сёйледи.
Къоркъмаскъаладагъы жумамежитни имамы Садрутдин гьажи Къазаватов да В. Путинни артда этген чакъырывун якълап, юртну жамиятын къыйын буса да чыдамлыкъгъа, сабурлукъгъа чакъырды.
Афгъан давланы ортакъчысы, райондагъы ветеранланы советини председатели Къураш Алиев де Президентни Чакъырывун якълайгъанны гьакъында айта туруп, Украинадагъы хас асгер операцияда оьзюню уланы да ортакъчылыкъ этегенни эсгерди. Олардан сонг чыгъып сёйлегенлер Мустапа Сулейманов, Жагьбат Болатова, Патимат Багьмутова ва башгъалары Россияны Президентини бир гьавур асгер къуллукъгъа чакъырывун якъладылар.
