Итнигюн, август айны 29-нда, «Дагестан» деген маълумат агентлигинде Дагъыстанны Хабаровск крайдагъы вакили Бейдуллах Исаев республика газетлени ва телевидениени мухбири булан ёлукъду.
Оьтгерилген шо прес-конференцияда ол инг алда август айны 9-ндан тутуп, 18-не ерли оьзю Луганск Халкъ Республикада болгъаны гьакъында айтды. Шо сапарыны барышында Б. Исаев бизин асгерлер Украинада юрютеген дав гьаракатларда ортакъчылыкъ этеген дагъыстанлылыгъа ДР-ни милли масъалалагъа ва дин булан байлавлу ишлеге къарайгъан министрлигини савгъатларын тапшургъан.
Шондан сонг ол Дагъыстанны ва Хабаровск крайны арасында бирге чалышывну болдурмакъ ва дослукъ аралыкълыкъланы беклешдирмек учун не къадар иш юрюлегени гьакъда баянлыкъ берди.
Ону сёзлерине гёре, бугюнлерде Хабаровск крайда 5 мингге ювукъ дагъыстанлы яшай. Шондан къайры да, эсгерилген крайда ерлешген асгер бёлюклерде къуллукъ этеген дагъыстанлы уланланы санаву 2 мингге етише. Эки де регионну арасындагъы экономика ва маданият байлавлукълар йыл сайын беклеше. Янгыз гетген йылны гьасиллерин гьисапгъа алгъанда, Хабаровск крайны ва Дагъыстанны арасында юрюлеген сатыв-алывну къадары 246 процентге артгъан. Шону булан бирге, эсгерилген крайда оьтгерилеген гьар тюрлю спорт ярышлар ва маданият гьаракатлар
Дагъыстанны атын данггъа чыгъарывгъа болушлукъ эте. Ачыкълашдырып айтгъанда, Дагъыстанны Хабаровск крайдагъы вакилигини сиптечилиги булан ювукъда Россияны Игити Нюрмагьаммат Гьажимагьамматовну эсделигине багъышланып, тутушуп ябушувдан ярышлар оьтгерилген. Шо ярышланы оьлчевюнде юрюлген тогъатартывларда 140-дан да артыкъ кочап оьзлени гючюн сынагъан. Эсгерилген ярышлар гележекде меррдешли кюйде оьтгерилежек деп гёз алгъа тутулгъан. Бу йыл Хабаровск крайда Дагъыстан Республиканы поэзиясыны гюнлери оьтгерилген. Шо гюнлени оьлчевюнде юрюлген къаравну барышында Йыракъ Гюнтувуш бойну бары шагьарларындан дегенлей поэзия асарланы охумагъа кёп сюегенлер ортакъчылыкъ этген. Шо къаравну алдынлысы Дагъыстангъа тегин сапар булан савгъатлангъан. Ол бизин республиканы къонакъларыны тергевюн тартагъан ерлеге баргъан, белгили шаирлер ва язывчулар, олай да маданият тармакъны ва инчесаниятны гёрмекли чалышывчулары булан ёлукъгъан.
Гелеген йылда Хабаровск крайда Расул Гьамзатов тувгъанлы 100 йыл битегенликге багъышлангъан гьаракатлар да оьтгерилежек. Шоларда Дагъыстандан гелген къонакълр да ортакъчылыкъ этежек деп къаравуллана. Хабаровск крайны ва Дербент шагьарны арасында да дослукъну ва бирге чалышывну гьакъындагъы разилешивге де къоллар салынгъан. Шо да бизин республиканы ва Хабаровск крайны арасындагъы байлавлукълукъланы беклешдирмеге къошум шартлар яратажакъгъа инамлыкъ тувдура.
