Бугюнлерде янгыз Дагъыстанда тюгюл, савлай Россияда да коронавирусдан авруйгъанланы санаву артып барагъанны эшитебиз. Айтагъаным, адамларда бу къоркъунчлу югъагъан аврувну новый Омикрон ва Дельта деген 2 тюрлюсю ёлугъа.

Мисал учун, Дагъыстанда август айны 24-нде 187 адам коронавирус юкъгъан деп гьисапгъа алынгъан. Шоланы арасында 2 адам гечинген. Шу бизин башыбыздан арчылып таймайгъан намарт аврув арагъа чыкъгъанлы, бютюн Россияны ичинде этилген тестлеге гёре, Дагъыстанда 96 минг 486 адамгъа коронавирус юкъгъаны ачыкълашдырылгъан. Оланы арасында 3 минг 598 адам оьлген, 90 минг 829 адам сав болгъан. Артдагъы маълуматлагъа гёре, умуми алгъанда бизин ­республикада бугюнлерде 2059 адам коронавирусдан авруй.
Ондан къайры да, COVID-19 яйылгъан йылланы ичинде ­Дагъыстанда 1 миллион 568 минг 848 адам бир тирет, 1миллион 409 минг 828 адам 2 керен вакцина этген. Россияны оьзге ерлери булан тенглешдиргенде, Дагъыстанда 1, 87 керен оьлегенлени санаву артыкъ. Айтма сюегеним, авруйгъан 1 минг адамны арасында 37 адам оьле. Оьзге регионларда буса 1 минг аврувну арасында 20 адам гечинген деп гьисапгъа алынгъан. Бизге шо агъулу балагь аврувдан хантав болма ярамайгъаны оьрде эсгерилген санавлар да гёрсете.