Гьали-гьалилерде «Ёлдашда» «Юрюген ёл алыр» деген баш булан Хасавюрт райондагъы «Батыр-бройлер» деген ихтиярлары дазуландырылгъан жамиятны чалышыву ва ишини натижалары гьакъда генг кюйде баянлыкъ берилген эди. Гьалиги заманда эсгерилген жамиятда оьсдюрюлеген ва гьазирленеген продукцияны санаву ва сан яны артып тербей.
Бугюнлерде алдынлы сынавну имканлыкъларындан ва асувлу къайдалардан пайдаланагъан коллективде болдурулагъан продукцияны оьзюне токътайгъан багьаларын ёрукълашдырывгъа да аслу тергев бакъдырыла десек, гьакъыкъатгъа къыйышмай къалмас.
Белгили болгъан кюйде, къушчулукъ тармакъда эт болдурувда емлер багьа олтура. Дагъы да аянлашдырып айтгъанда, къуш эт учун этилинеген харжланы 75 проценти емлер учун пайдаландырыла. Шону гьисапгъа алып, бугюнлерде белгили къуш комплексде къошулчан емлер гьазирлейген янгы завод къурулуп тура.
– Заводну къурулушун бу йылны июль айыны ичинде тамамлап пайдаландырывгъа бермеге умут этиле, – деди «Батыр-бройлерни» кюрчюлендирген башчысы Аштар Батыров республикабызны маълумат къуралларыны къуллукъчуларына берген баянында. – Къошулчан емлер гьазирлевню пайдасы – уллу. Биринчилей, оьсдюрюлеген къуш этни оьлчевлери ва сан яны къолайлаша. Уьстевюне, шону учун этилинеген харжланы тутумлу кюйде къолламагъа имканлыкълар яратылына. Демек, аз емлер булан продукцияны къадарын артдырмагъа ёллар ачыла.
Белгили болгъан кюйде, буссагьатгъы вакътиде бир кило къуш этни болдурмакъ учун, 1, 67 кило ем харжлана. Къошулчан емлеге гёчген сонг, шо санав 1,55 килодан оьрде болмажакъ. Демек, суткада эт учун сакъланагъан къушлагъа къошулагъан орта авурлугъу 68 грам болажакъ. Буссагьатгъы вакътиде шо санав 60 грам болуп токътай.
Къуш комплексини талаплары учун къурулагъан янгы заводгъа къураллар Тюркиядан гелтирилегени ва шолай емлер гьазирленеген завод бизин республикабызда биринчилей къурулагъаны гьакъда да айрыча эсгерме герек. Къуш комплексдеги завод толу кюйде ишге берилген сонг, мунда йылда 63 минг тон къошулчан емлер гьазирлеме имканлыкълар яратылынажакъ.
Шолайлыкъда, гележекде къошулчан емлени гьар тюрлю югъунчлу маддалар булан пайдаландырывну натижасында оьсдюрюлеген продукциясы да 30 процентге ерли артажагъы шексиз. Бирдагъы бир асувлулугъу – къошулчан емлени ерден-ерге ташымагъа ва сакълавгъа салмагъа деп этилинеген харжлар да алдан эсе хыйлы кем болажакъ.
Къ. КЪАРАЕВ.
Юрт хозяйство министерлигини
сайтындан алынгъан.
