Уллу Ватан давда бизин Къызыл Армия ва ону булан бирче уьлкени ватандашлары гёрсетген къоччакълыкъ, ватангъа аминлик, герти патриотчулукъ, оьзге тюрлю гёрмекли ишлер йыллар гете туруп арек йылышса да унутулмай, наслудан-наслугъа айтыла геле. Бу йыл да, алдагъы йылларда йимик, оьзге регионлар булан бирче Дагъыстанда да Уллу Уьстюнлюкню 77 йыллыгъына багъышлангъан байрамны оьтгерилежек кююне байлавлу чаралар алданокъ гьазирленип белгиленген.

 

Май айны 7-синде Магьачкъалада Дагъыстан па­­чалыкъ филармонияда, Къу­­мукъ театрны алдында, «Россия – мени тарихим» деген паркда, Фазу Алиеваны аты къоюлгъан гюлбавда, Ленинчи Комсомолну атындагъы, «Октябрни 50 йыллыгъы» деген паркларда, Орус интеллигенциягъа салынгъан эсделикни алдында «Уьстюнлюкню язбашы» деген чаралар оьтгерилежек.

Магьачкъалада 9-нчу майда, эртен вакътиден башлап, маданият чаралар адамланы тергевюн тартажакъ чаралар айрокъда кёп болажакъ. Сагьат 8-де Ленинчи Комсомолну атындагъы паркда азатландырывчу солдатны эсделигини тюбюне чечеклер салынажакъ. Чечеклер асгер къабурлардагъы «Асгерлик Макътав» деген эсделикни тюбюне де салынажакъ.

Сагьат 10-да Ленинни атындагъы майданда хас митинг къаравуллана. Сонг, 11-ге 40 минут ишлеп, эки сагьатгъа ювукъ вакътини ичинде, Магьачкъаланы уллу орамларында хас байрам автомашин гьайдав юрюлежек. Артда да гьар тюрлю майданчаларда концерт программалар къаравуллана. Къарангы болгъанда, тахшагьарлылар булан бирче гелген къонакълар да (21 сагьатда) Ленинни атындагъы республиканы баш майданына чыкъса, «байрам салютгъа» къарама болажакъ.

“Эсделик полк» деген Бютюнроссия чара да къурумлу оьтгерилсин учун, республиканы жамият ва пачалыкъ къурумларыны янындан ал­данокъ амалгъа гелген гьазирлик де бар.

 

Н. Магьамматов.