13-нчю апрелде Дагъыстанны Башчысы Сергей Меликов Москвада «Газпром межрегионгаз» деген къурумну ёлбашчысы Сергей Густов булан ёлукъгъан. Ёлугъувну ортакъчылары аслу гьалда Россияны Президенти В.Путинни юртланы «газлашдырыв» масъаласыны айланасында пикру алышдыргъан.
Сергей Густов Президентни тапшуруву йылны ахырына тамамлана-жакъны айтгъан ва арза беривлени ёрукълашдырмакъны таклиф этген.
С. Меликов айтагъан кюйде, Дагъыстанда газ тартылмагъан юртлар бар саялы гьар онгайлы гюнню асувлу къолламакъ гёз алгъа тутулгъан. Дагъы да ол Уллу Ватан давну ва загьмат фронтну ортакъчылары, сакъатлар, яшаву осал агьлюлеге тарыкъ газ къураллар алмакъ ва оьзлени дазусундан уьйге ерли газ тартмакъ учун 90 минг манатдан кем болмайгъан кюйде харж булан таъмин этилежекни билдирген.
Бугюнлеге ерли 2147 адамдан арза гелген, шолардан да 1871 адамны арзаларына къаралгъан. 120 адамгъа газ тартылып да битген.
Дагъыстандагъы юртланы 2021-2025-нчи йылларда газ булан таъмин этмек учун хас программа къабул этилинген. Шо ишлени кютмек учун 13,1 миллиард манат гёрсетилген. Газ булан толу кюйде таъмин этмек учун Дагъыстанда 914 чакъырым ерге газ быргъылар тартма герек. Шо буса 202 юртдагъы 40 минг агьлю бола. Бу 2022-нчи йылгъа 55 газ пайлайгъан станциялар къурмакъ учун ахтарыв-проект ишлер юрюлюп тура.
Эгер де ким 2021-нчи йыл 21-нчи апрелден сонг оьзюню акъчасына газ тартгъан буса, харжлагъан акъчасы къайтарыла. Шо ишлер учун да республиканы бюджетине 100 миллион манат салынгъан. Шондан 1 минг адамгъа харж енгилликлер гёрсетилгенлеге берилежек.
Бугюнлерде де адамлардан арзалар жыйыв давам этиле, шо ишлер Дагъыстандагъы 39 газ къуллукъларын кютеген ерлерде, ерли администрацияларда ва республикадагъы МФЦ-ни 43 филиалында къабул этиле.
Бизин мухбирибиз.
