Россияны Президенти, уьлкени асгерлерини Башкомандующийи В.В.Путинни буйругъу булан февраль айны 24-ден тутуп, Украинаны миллетчи, законсуз гьукуматына къаршы хас дав гьаракат башланды. Шо узатыла.
Къумукъ халкъны уьй алгъынча, хоншу ал деген бек маъналы айтыву бар. Дейгеним, шо хас операция Украинаны халкъына къаршы бакъдырылмагъан. Шо оьзюню оьз халкъына гюч этип, эревюллю адамларын от-ялынгъа тутуп уьст гелген законсуз гьакимиятны алгъанлагъа къаршы бакъдырылгъан.
Гьалиден 30 йыллар алъянда, совет пачалыкъ тозулуп, узакъ къалмай, Союзну эркеси, байыкъгъан, бадырап турагъан Украина, сайки, харлысызлыкъны, эркинликни сайлады. Натижада, Американы Бирлешген Штатларын, давлубаз НАТО булан бирче, къалп байлыкъгъа амракъ оьзге пачалыкъланы бугьтан, ялгъан къастларына инанып, оланы къолтукъ тюбюне сыйынды. Донецк ва Луганск бойланы къысасгъа салды. Шо бойда яшайгъан миллионлар булангъы халкъланы ана орус тилин бютюнлей инкар этди. Гьар гюн дегенлей топлар булан атышып, оланы жазагъа тутма башлады. Шо вагьшили къысас сегиз йыллагъа ювукъ узатылып турду.
Украинаны гьукуматыны законсуз гелген башчылары узакъ къалмай миллетчиликни, милитарист, фашист идеологияны торуна тюшдю.
Шо себеплер мени, миллионлар булангъы россиялыланы Президентибиз В.Путинни хас дав гьаракатыны гьакъындагъы сиптесин гьакъ юрекден якъламагъа борчлу этди.
Мен чагъыма гёре, гьали-дагъы дегенлей 85 йылыма абатланажакъ тамазаман. Мени чагъымдагъылагъа «Давну яшлары» дейлер. Атам Ватан давдан авур яраланып къайтды. Къалгъан оьмюрюн сакъатлыкъда йиберди. Ону иниси, зукъариси давдан къайтмай къалды. Шо саялы дав йылларда ач-ялангъач оьсген мен дав не экенни, ону азабы нечик болагъанны яхшы билемен.
Болса да, Президентимни якълайман. Неге тюгюл, алдынлыкъ этип биз «къапас» урмагъан бусакъ, украинли фашистлер бизге хапарсыздан къатылма къаражакъны гьис эте эдик. Шону, гертилей де, сонггъу гюнлер исбат этди.
Украинада юрюлюп турагъан хас дав операция бизин бир-бир ватандашланы яшырып юрюген юзюн ачды. Амма шолайлар 8 йылны узагъында гьар гюн къанына батып, бир гюнагьсыз жанлары къыйылып тургъан донецкилилени, луганскилилени неге якъламай эдилер?! Мен эшитеген кюйде, гюнбатыш пачалыкълагъа къачып гетегенлер де бар. Къой, гетсинлер! Къайтмасынлар!
Бизин къоччакъ асгерчилер (шоланы арасында мени ата юртлуларым да бар) душманлардан Ватаныбызны къоружакълар. Шогъар шеклик этмеймен.
Бизин Россияны халкъыны авадан кёп яны, мени йимик, В.Путинни харлысыз, оьзтёрече политикасын якълай.
Д. АЛКЪЫЛЫЧЕВ,
ДР-ни маданиятыны ат къазангъан къуллукъчусу, журналист.
