Ёлугъувда аслу гьалда республикадагъы яшавлукъ-экономика масъала­лагъа къаралгъан. Сергей Меликов Дагъыстандагъы гьалны коронавирус аврувну алдын алмакъ ва тайдырмакъ учун этилинген ишлерден башла­гъан.­ Бир-бир районларда вакцина этив 90 процентге етишгенни ва шо ишде Россияны Савлукъ сакълав министерлигини ва ерли муфтиятны кёмегин де эсгерген.

 В. Путин промышленност савлай Россияда 3,1, Дагъыстанда буса 16 процентге нечик артгъанны сорады. Сергей Алимович алдагъы Башчыны ишлерин давам эте туруп, оьтген йылда кёп санавдагъы гьисапгъа алынмагъан къурумлар арагъа чыгъарылгъанны ва экономиканы яшыртгъын тармакъларын аянлашдырмакъ учун кёп иш этилингенни, шолай да, юрт хозяйствону ишлери яхшылашдырылгъаны гьакъында айтгъан.

–Дагъыстанда алдан берли де юрт хозяйство тармакъ инг де аслу деп гьисаплана гелген, – деген С.Меликов. – Артдагъы йылларда биз шо тармакъгъа бакъгъан тергевюбюзню артдырдыкъ. Бавлар салынды, емишлени сакълама ерлер этилди, юзюмчюлюк арта бара. Шо буса эки уллу заводубузну асувлу ишлетме имканлыкъ бережек. Узакъ къалмай совет девюрдеги даражагъа етишме хыял бар. Тек бавлар яш, олардан толу гелим 4-5 йылдан алынма башлай.

В. Путин республиканы Башчысына сув булан таъмин этив масъаланы да сорагъан. С. Меликов сув, газ, электрик хозяйстволаны ёрукълашдырывда этилинген кёмеклер учун Президентге разилигин айтгъан. Барын да шоссагьат кютме болмай, шону уьстюнде кёп йыллар ишлеме герекни де билдирген. Магьачкъала, Каспийск, Избербаш шагьарланы сув булан таъмин этив къыйын шартларда юрюлегенни эсгере туруп, кёбюсю къурулушлар ярты кюйде къалгъан саялы, В.Путинни тапшурувуна гёре Гьукуматны янындан 10,5 миллиард манатгъа кёмек этилгенни де айтгъан. Тезде Чиркей ГЭС-ни суву сакъланагъан ерден Магьачкъалагъа ва Избербашгъа сув тартыв ишлер башланажакъ. Сонг Кас-пийск, Дербент, бара-бара савлай Дагъыстанны ичеген сув булан таъмин этме болажакъны, сувланы тазалайгъан имаратлар да етишмей, тек шо ишлер юрюлюп турагъанны эсгерген.

Президент адамланы иш булан таъмин этив нечик юрюлегенни де ва шо масъаланы чечмек учун не кёмек, нечик чаралар болдурмакъны да сорагъан.

Сергей Меликов 2021-нчи йылда иш тапмайгъанланы санаву 3 керенге кемигенни айта. Яшыртгъын тармакъланы ишин тергегенде аян болгъан, онгача ишлеме сюегенлеге ишин ачмакъ учун енгил кредитлер берилген, шолай да рес­публикада кёп тюрлю янгы проектлер ишлеме башлагъан. Шулай гьаракат адамланы яшавун яхшылашдыражакъгъа шеклик этмейгенин билдирген.

Иш тапмайгъанланы гьакъында сёйлевюн давам эте туруп, Дагъыс­танны Башчысы Дербентде юрюлюп турагъан ишлени де эсгерген. Бугюнгю инвестиция проектлени кёбюсю Россияны инг де дегенлей бырынгъы шагьары Дербент булан байлавлу. Шо ишлер сенатор Сулейман Керимовну сиптечилиги булан этиле. Огъар разилигин билдирген. Эсгерилген проектни кютмеге 170 миллиард манат гёрсетилген, шолардан 70 проценти – онгача айры адамланыки. Шо ишлер янгыз шагьарны гёзеллигин артдырып къоймай, иш ерлер ачылып, адамлар учунгъу янгы уьйлер къурув, туристлени геливю ва шолай башгъа гьаракатлар булан да байлавлу.