Пачалыкъ программаланы яшавгъа чыгъарывда Къаягент район –алдынлылардан бириси. Артдагъы 3 йылны ичинде шоларда ортакъчылыкъ этмеге 30 хас программа язылгъан, шоланы 20-сы якълангъан. Ра­йонну ёлбашчылары шолай программаларда гележекде де ортакъчылыкъ этмеге гьазир. Неге тюгюл, олар янгы яшавлукъ объектлени къурмагъа, эсгилерин буса ярашдырмагъа имканлыкъ бере.

 

«Ерли сиптечилик» деген рес­публика программа Дагъыстанны экономика министерлигини гючю булан яшавгъа 2019-нчу йылдан берли чыгъарыла. Проектни кюрчюсю – районланы оьсдюрювню аслу масъалаларын яшавгъа чы­гъарыв. 2022-нчи йылда да «Ерли сиптечилик» деген республика программа давам этилежек, ону яшавгъа чыгъармакъ учун 400 миллион акъча маялар гёрсетилген.

Уьстде эсгерилген программагъа гёре, Къаягентдеги «Юлдуз» деген яшланы бавун ярашдырмагъа 4,450 минг манат акъча маялар гёрсетилген эди. Февральны 12-синде ясли-бавну бинасында ремонт ишлер тамамланды. Бина янгыртылды, ичиндеги поллары алышынды, оьзге ишлер этилди. Мундагъы 420 гиччипав учун 12-нчи февраль байрам гюн болуп токътады.

Ярашдырылгъан яшланы бавун ачывгъа байлавлу чарада Къаягент районну башчысы Магьаммат Элдерханов, депутатланы район жыйыныны председателини заместители Исламутдин Къайыров, Къаягент районну билим берив управлениесини ёлбашчысы Мурат Рашитов, ремонт ишлени оьтгеривге кёмек къолун узатгъан ерли далапчылар, яшланы бавуну къуллукъчулары, яшланы ата-аналары ортакъчылыкъ этдилер.

– Сизин къуванчыгъыз – бизин къуванчыбыз, – деди оьзюню сёйлевюнде районну башчысы Магьаммат Элдерханов. – Бугюн 420 яш ва оланы ата-аналары этилген ишлеге сююнелер, къурувчулагъа гьакъ юрекден баракалла берелер. Биз де разилигибизни билдиребиз. Бир жумадан Первомайскоедеги яшлар бавунда да къуванч гюн болажакъ. Онда да ремонт ишлер тамамлана тура.

Районну башчысындан сонг чыгъып сёйлеген яшлар бавуну заведующийи Айна Гьажимуратова Къаягент район администрацияны ёлбашчыларына, «Спецпромстрой» деген къурумну ёлбашчыларына, къуллукъчуларына, къурувчулагъа баракалла билдирди.

Байрам чарада чыгъып сёйлеген депутатланы район жыйыныны председателини заместители Исламутдин Къайыров, районну билим берив управлениесини ёлбашчысы Мурат Рашитов, яшланы ата-аналарыны атындан Лейла Къайырова жыйылгъанлагъа исси сёзлер айтдылар.

«Ерли сиптечилик» деген рес­публика программаны Къаягентдеги «Юлдуз» деген яшланы бавунда яшавгъа чыгъарывда уллу къошум этген далапчылагъа, «Спецпромстрой» деген къурумну, яшлар бавуну къуллукъчуларына Къаягент районну башчысы М.Элдерханов баракалла кагъызлар тапшурду.

 

Магьаммат-Расул Ибрагьимов.

Къаягент район.