Къоркъмасовну тувгъан гюнюне багъышлангъан жыйынны ача туруп, бир башлап Хумторкъали район администрацияны башчысыны заместители Дагьир Абдурагьимовгъа сёз берилди. Ол Къоркъмасовну гьакъында къысгъаракъ маълумат бере туруп, жыйынгъа гелгенлени Жалалутдинни тувгъан гюню булан къутлады ва гелген къонакълагъа район администрацияны атындан разилигин билдирди.
Жалалутдин Къоркъмасовну республика фондуну ёлбашчысы Гьюсейн Адилов оьзюню сёйлевюнде Жалалутдин Къоркъмасовну яшавундан ва политика чалышывундан оьзю ахтаргъан янгы маълуматланы берди. Сонг жыйылгъанланы Магьачкъала шагьарда университетни алдындагъы майданда Къоркъмасовгъа салынажакъ эсделикни суратлары булан таныш этди.
Дагъыстанны халкъ шаири Агьмат Жачаев оьзюню сёйлевюнде Торкъали юртдан чыкъгъан оьзге белгили адамланы атларын да эсгерди, жыйылгъанлагъа бир шиърусун да охуду. Язывчу Латип Гьажакъаев Жалалутдинни таныгъан адам булан болгъан ёлугъувуну гьакъында хабарлады.
Къоркъмаскъала орта школаны директору Мурат Ягьияев оьзюню сёйлевюнде Къоркъмаскъала школагъа белгили юртлусуну атын уллу оьктемлик булан юрютегенни, гьар йыл ону тувгъан гюнюн школада да белгилейгенни айтды.
Россияны ат къазангъан артисти Байсолтан Осаев Жалалутдин Къоркъмасов оьзю Дагъыстангъа ёлбашчылыкъ этеген вакътиде, янгыз политика масъалалар булан машгъул болуп къалмай, маданиятгъа да, айрокъда Дагъыстанны халкъларыны театрларын къурувну масъалаларына да кёп агьамият бергенин эсгерди.
Къоркъмаскъала школаны яшлары Жалалутдин Къоркъмасовну яшаву ва яратывчулугъу гьакъда хабарлай туруп, огъар багъышлангъан шиърулар охуду. Къоркъмаскъала юртдагъы ял алыв центрыны къуллукъчулары Умлайла Бадирибова ва Рукъуят Айланматова жыйылгъанлагъа гиччирек концерт де гёрсетдилер.
Жыйынны ахырында гелген къонакълар ва школаны охувчулары Жалалутдин Къоркъмасовну эсделигине чечеклер сала туруп, эсделикни алдында жыйылып суратлар да чыгъардылар.
Жават ЗАКАВОВ.
СУРАТДА: Ж. Къоркъмасовну эсделигини алдында жыйын юрюлеген вакъти.
