Сентябр айны 15-нде Дагъыстанны Башчысыны борчларын заманлыкъгъа кютеген Сергей Меликов, Республиканы халкъларыны бирлигини гюнюнде гьар тюрлю тармакъларда гьаракатчылыкъ гёрсетген дагъыстанлылар булан ёлугъуп, олагъа пачалыкъ савгъатлар тапшургъан. Ёлугъувну ача туруп, ол эсгерген кюйде, кёп миллетли республика учун Халкъланы бирлигини гюню агьамиятлы ва таъсирли байрам болуп токътай.
Савгъатлар берилгенлени арасында медицина илмуланы доктору Сагьадулла Абакаров да бар. Алда ол билим беривню ва технологияланы тармакъларында Россия Федерацияны Пачалыкъ савгъатын да къазангъан болгъан. Регионну ёлбашчысы Абакаровгъа «Республиканы алдындагъы къуллукълары учун» деген орден тапшургъан.
Къызлар шагьардагъы районара «Скорая медицинская помощь» деген идараны баш врачыны заместители Анатолий Алексашкин «Дагъыстанны ат къазангъан врачы» деген атгъа ес болгъан. Хасавюрт районну Эндирей юртунда ачылгъан 2 номерли орта школаны директору Муратбек Айдемировгъа да «Дагъыстан Республиканы ат къазангъан муаллими» деген ат берилген. Рутул райондагъы «ДАССР-ни 50 йыллыгъы» деген юрт хозяйство идараны механизатору Нуредин Летифовгъа буса «Эсделик сагьат» савгъат этилген.
РФ-ни Президентини баракалла кагъызын республикада инг де къыйматлы деп гьисап этилеген Къарабудагъгент жамият къурумну ёлбашчысы Али Мусаев алгъан. Бары да савгъатлангъанланы санаву 30-дан да оьте.
Бизин мухбирибиз.
