Оюнну башындан тутуп бизинкилер къонакъланы оьзлени къапусуна къысды.    «Анжини»    орта якълавчулары  Амаду Мутари ва Магьаммат Митришев футбол майданны    эки де янындан чапгъынлар эте туруп, «Крылья Советовну» якълавчуларына ва къапучусу Конюховгъа кёп гюч этди. Биринчи он беш минутну ичинде «Анжи» къонакълагъа оьзлени къапусун якълап тюгюл дагъы кюйде ойнамагъа къоймады. Тек  болгъан бир нече къоркъунчлу мюгьлетни де къолдан чыгъарып, гол  гийирип болмады. Оюнну биринчи таймы орталаша туруп, къонакълар эс тапды, чапгъынлар этме башлады, гьатта бизин къапучу Кержаковну штрафноюнда къоркъунчлу  мюгьлетлер де болду . Сав оюн бек къужурлу, къаравчулар учун иштагьлы оьтдю. Эки де команда бары да гьюнерин шо гюн  «Анжи- Аренада» гёрсетди. Къонакъланы составындагъы алдынгъы «Анжини» футболисти Георгий Габулов  о оюнда айрыча гьаракатчылыгъын ва усталыгъын малим этмеге болду. Ол не оьзюню, къонакъланы составында, не бизин футболистлени аямайлы ойнай эди.  Габуловдан къайры да ойнайгъан Цаллагов ва Ятченко, Канцедалов ва Чочиев оьзлени гьюнерин гёрсетди. Бу футболистлени къаравчулар премьер­-лигадан берли таный.

«Анжини» составында буса Али Гьажибеков, Амаду Мутари, къайтып командагъа къошулгъан Александр Алиев ва Магьаммат Митришев айрыча арив оюнун гёрсетди.  Биринчи таймны футболистлер бир бу къапугъа, бир де бириси къапулагъа чапгъынлыкълар эте туруп йиберди, тек оюнну санавун чу ачып болмады.

Танапусдан сонг бизинкилер къонакъланы биринчи таймны башындагъы чапгъындан да гючлю чапгъынлагъа тутду. Оюнну 53-нчю минутунда, самаралыланы якълавчуларыны хатасындан пайдаланып, Александр Алиев оюнну санавун ачды. Голдан сонг, оюн биринчи таймда йимик эки де команданы чапгъынлары булан оюнну 72-нчи минутуна ерли давам этилип турду. Оюнну 72-нчи  минутунда  Магьаммат Митришев, къонакъланы штрафноюндан къангып гелеген топну гючю булан уруп, ону Конюховну къапусуну къапучугъа ювукъ мююшюне гийирди.

Арадан уьч минут да гетмей, самаралы Алан Чочиев, бизин Альмейда Эвертонну хатасындан пайдаланып, гол гийирип, оюнну санавун 2:1 этди. Шо минутдан тутуп, къонакъланы савлай командасы булан «Анжини» къапусуна чапгъынларын башлады. Ташуев  футбол майдангъа арты-артындан дёрт артгъа салгъан футболистни чыгъарды. Самаралылар оюн битгинче оюнну санавун тенг этмеге болмады. Оюнну лап ахырында Абдуллавов, Сердеров ва Амаду Мутари, оьзлени къапуларыны гьайын да этмей, алгъа гетген къонакълагъа, азындан, дагъы да эки гол сама гийирип бола эди, тек оланы шогъар усталыгъы етишмеди.  

Оюн битгенде береген баянлыгъында Ташуев оюнну санавуна разилигин билдирди. Ювукъ вакътини ичинде командагъа дагъы да дёрт футболист гележегин айтды. Оланы бириси – Украинаны чемпионатында айтылгъан  Боли деген чапгъынчы, бириси де – Леонардо. Шу футболистлер дыгъарлагъа къоллар салгъан. Оьзлер булан дыгъар байланажакъ дагъы да эки футболистни атларын Ташуев айтмады.

 

Шарапутдин КИШИЕВ.

СУРАТДА:  Кержаковну къапусуну алдындагъы къоркъунчлу мюгьлет.