Россияны Президенти Владимир Путин ва Тюркияны Президенти Режеп Тайип Эрдоган, Сочиде ёлугъуп, алты сагьатдан узакъ заман сёйлешивлер этген. Путин англатгъан кюйде, ёлугъувну гьасиллерине гёре къыйматлыгъы булангъы масъалалагъа тиеген къарарлар къабул этмеге бажарылгъан ва Сирияны дазусунда тувулунгъан къыставуллу гьалны басылтмагъа шолар имканлыкъ бережек. Алда шо бойда Анкараны сиптеси булан «Источник мира» деген асгер гьаракаты (операция) юрюле эди. Эки де якъ арив гёрген дыгъаргъа къыйышывлу болуп, тюрк асгерлери гьаракат гёреген бойну дазусундан тыш ягъына сириялы асгерлер ва россия асгер полициясы ерлешип токътажакъ.
Россияны Президенти Владимир Путин Тюркияны Президенти Режеп Тайип Эрдоган булангъы сёйлешивлени гьасиллерине гёре юрюлген прес-конференцияда Москва ва Анкара Сирияны темиркъазыкъ боюндагъы эришивлю гьаллагъа байлавлу къысмат къыйматлыгъы булангъы разилешивлеге етишме бажарылгъанны билдирген.
«Узакъ болжаллы ва къаныгъывлу кюйде юрюлген ишлени натижасында агьамиятлы дыгъарлагъа етмеге болгъаныбызны уллу разилик булан эсгермей къойма кюй ёкъ. Бизин билдиривлерибизден сонг тыш ишлер министерликлерибиз шолар не дыгъарлар экенни малим этежеклер», – деген Президент.
Россия пачалыгъыны башчысы эсгергени йимик, етишилген разилешивлер бугюнлерде сирия-тюрк дазусунда тувулунгъан оьчешив гьалны чечмеге онгайлыкъ бережек.
Документде берилеген баянлыкъгъа гёре, олар Сирияны асгер бёлюклерин ва шону савутларын сирия-тюрк дазудан 30 чакъырым арекге йылышдырма имканлыкъ бережек. Бу иш 2019-нчу йыл октябрни 23-нде гече сагьат 12-ден сонг 150 сагьатны ичинде яшавгъа чыгъарылма герек. Токъташдырылгъаны йимик, шо мюгьлетден тутуп, Къамышлы деген шагьарны къошмай, тюрклер токъташгъан райондан гюнбатышгъа ва гюнтувушгъа ювукъдагъы дазуну 10 чакъырым теренине гирип, россия ва тюрк асгерлери гёз къаравул этмеге башлажакъ.
«Дазуда парахатлыкъны ва рагьатлыкъны тюрклеге ва сириялылагъа къыйышып бирче сакълайгъан кюйню этмеге тюшежек. Мунда Тюркия ва Сирия бир-бирине гьюрмет этип янашып, бирче чалышмаса дагъы гьеч амал ёкъ», – деген В. Путин.
«Биз эс этеген кюйде, Сирияда узакъ замангъа ёрукълукъну ва парахатлыкъны сакълама бажарылажакъ, эгер шо уьлкени территориясы бар кююнде онгачалыкъда къалса. Бу дюр шу масъалагъа биз адилли кюйде янашагъанлыкъны мисалы. Тюркияны президенти булан о гьакъда тындырыкълы кюйде сёйледик. Бизин бу оюбузну тюрк пачалыгъы да арив гёре», – деген Путин. Ондан къайры да, В.Путин сириялылагъа тышдан оьз ватанына къайтмагъа алданокъ гьеч бир талаплар салмай кёмек этмеге халкъара жамиятын да чакъыргъан.
Оьз гезигинде Эрдоган Сирияны темиркъазыкъ боюнда сепаратист питнечиликлеге Россия гьеч ёл къоймажакъ, деген. Ол айтагъангъа гёре, Сирияны дазуларын бар кюйде сакълавну ва террорчулукъгъа къаршы ябушувну масъаласын Путин булан оьзю терен кюйде арагъа салып ойлашгъан.
– Сёйлешивлени яхшылыгъындан Сирияны топурагъында къайсы буса да бир сепаратист питнечи гьаракатны яратывну къатты кюйде алды алынажакъ. Тюркия ва Россия пачалыкълары шо ишни терс гетме къоймас учун белсенген. Тюркиягъа гьеч башгъа биревню топуракълары гьажат тюгюл. Анкара Сирияны аманлыгъын якълавну ягъы.., – деген Эрдоган.
Ол билдиргени йимик, «Источник мира» деген асгер гьаракатыны барышында шо бойланы террорчулардан тазаламакъ учун къолдан гелеген бары да зат этиле. Тазалангъан шо топуракъларда тышгъа къачгъан сириялыланы къайтарып сыйындырмакъ гёз алгъа тутула. Тюркияны баш гьакими гьисап этеген кюйде, тышгъа къачгъан сириялыланы санаву 1 миллионгъа етише.
Путинни ва Эрдоганны арасында юрюлген сёйлешивлени гьасиллерине гёре этилген разилешивлени гьакъында Сирияны Президенти Башар Асадгъа да хабар етишдирилген.
«Россия пачалыгъыны башчысы Эрдоган булан 6 сагьатдан да узакъ заман юрюлген сёйлешивлени маънасын Сирияны башчысына англатгъанбыз ва сёйлешивлени натижасына гёре болгъан разилешивлени ва бирге иш гёрювню аслу шартларын малим этгенбиз», – деп билдирген Россияны Башчысыны прес-секретары Д.Песков.
Асад да Путин ва Эрдоган бирче къабул этген дыгъарланы арив гёрген. Ол Владимир Путинге баракалла билдирген ва Россияны асгер полициясы булан Сирияны дазучулары дазу бойну бирче сакъламагъа гьазир экенин билдирген.
РИА «Новости».
