Белгили экени йимик, артдагъы вакътилерде бизин уьлкеде гьар къайсы тармакъда байлавлукъланы беклешдиривге айрыча тергев берилип геле. Шолай, Россияны маданият министерлигини сиптечилиги булан яшавгъа чыгъарылагъан «Уллу гостроллар» деген федарал программасы гиччи шагьарларда иш гёреген милли театрлагъа барып, къаравчулагъа оьзлени яратывчулугъун гёрсетмеге имканлыкълар ярата.
Оьрде эсгерилген программаны шартларындан пайдаланып гелген Татарстан Республиканы Мензелинск шагьарында иш гёреген Сабир Амутбаевни атындагъы пачалыкъ татар театрыны артислери арбагюн, октябр айны 9-нда къумукъ къаравчулагъа эки спектаклин гёрсетди.
Бир башлап олар А. Салаватовну атындагъы Къумукъ пачалыкъ музыкалы-драма театрыны сагьнасында татар адабиятны кюрчюсюн салгъанланы бириси Абдулла Токъайны «Эчкини ва Къойну гьакъында» ёммакъ деген асарына гёре къурчакъ спектаклни гёрсетип, яш къаравчуланы разилигин къазанды. Шо гюн ахшам буса инг алда ТАССР къурулгъанлы 100 йыл битегенликге багъышланып, театрны артистлерини гьаракаты булан онгарылгъан концертни берди . Сонг да, ажербайжан адабиятыны классиги Гьюсейин Жавитни пьесасына гёре салынгъан «Иблис» деген спектакль булан къаравчуланы харс урувларын къазанды.
Гертисин айтгъанда, кёпден берли гёрмегенге, бир-бирин танымагъангъа гёре, тиштайпа себепли болуп оьзлени арасында татывсузлукъ тувулунгъан агъа-ини Ариф ва Васиф баш игитлер гьисапда агьвалатланы барышына къаравчулар сагьнадан гёзюн айырмайгъан гьалда къарап турдулар. Спектакльни сагьнагъа салагъанда режиссёр тапгъан янгы къайдалардан къайры да, театрны артистлерини келпет яратывдагъы усталыгъы да шогъар туврадан болушлукъ этди деп айтмагъа ярай. Нечик де, спектакльни игитлерине оьлтюрювлени де гёрмеге, тонавланы, оьзге тюрлю авур къайгъыланы башдан гечирмеге тюше. Лап артда да, сабурлукъгъа, рагьмулукъгъа, татывлукъгъа, чыдамлыкъгъа, чомартлыкъгъа чакъырыв этилеген спектакльни игитлерини бирисини къолуна Иблис гюзгюню тутдуруп, оьзюню юзюне къарамагъа борчлу эте. Шолайлыкъда, огъар, шону булан бирге, гьар адамгъа да эрши, халкъ арада да, эл арада да Яратгъан Есибизни янындан да сёгюлген битимлерден, адилсиз хасиятлардан къутулмакъны къастын болдурмагъа тарыгъына тюшюндюре.
Мензелинск шагьарында иш гёреген Сабир Амутбаевни атындагъы пачалыкъ Татар театрыны директору, Татарстанны маданиятыны ат къазангъан къуллукъчусу Роберт Шаймарданов бизин булангъы лакъырында эсгергени йимик, шо спектакльни Россияны маданият министерлигини оьрде эсгерилген программасына гёре театргъа чыкъырылгъан режессёр Якъутия-Саха Республиканы инчесаниятыны ат къазангъан чалышывчу Сергей Патапов салгъан. О къаравчулагъа биринчилей 2017-нчи йылда гёрсетилген. Къаравчуланы ва касбучуланы янындан оьр къыймат берилген. Татарстанда гьар йыл театрланы арасында оьтгерилеген «Тантана» («Триумф») къаравуну «Йылны агьвалаты» деген тиретинде алдынлыкъ алгъанлыгъы да шону герти кюйде исбатлай. Магьачкъалагъа гелгинчеге де Ульяновск, Волгоград, Аштархан шагьарларда да гёрсетилген.
Насрулла БАЙБОЛАТОВ.
П. БЕКЕВА чыгъаргъан суратлар.
