Артдагъы заманларда дюньяны даражасында онкология аврувлагъа аслу тергев берилип турагъанны гьис этебиз. Неге тюгюл, бу намарт аврув халкъарада бек яйылып бара демеге ярай. Шо янларын да гёз алгъа тутуп, бугюнлерде Венгрияны тахшагьары Будапештде дюньяда чинк де агьамиятлы шо масъалагъа байлавлу радиологланы европа конгреси оьтгерилди.
Шо уллу жыйында 140 пачалыкъдан баргъан 25 минг касбучу болгъан. Шонда биринчилей бизден де чакъырылып баргъан врачлар, Дагъыстанны радиологларыны ва маммологларыны бирлешивюню ёлбашчысы, маммология центрны баш врачы Фатима Тамаева ва ону заместители Карина Терещенко да ортакъчылыкъ этгенлер. Олар – молочный железагъа къарайгъан Европа жамиятыны членлери. Шо даражагъа сынавлу ва яхшы англавлу врачлар етишме бола.
Уьч гюн юрюлген конгресни дазуларында кёп тюрлю пайдалы масъалалар гётерилген. Шо гьакъда бизге Фатима Тамаева билдирди.
Олар конгресде маммографияны, томосинтезни, контрастный томографияны теориясына ва практикагъа багъышлангъан жыйынларында ортакъчылыкъ этгенлер. Шонда олагъа молочный железагъа къабунагъан рак аврувну гьакъында кёп уллу сынав топламагъа бажарылгъан. Шо конгресде рак аврувну нечик бакъма герегини гьакъында сёз юрюлген.
Ондан къайры да, аслу масъалалардан бири гележекде болажакъ рентгенологлар, радиолог жамиятлар медицина къуллукъланы даражасыны сан янын не къадар гётерме тарыкъны гьакъында лакъыр этгенлер. Олай да, врачлар аврувну токъташдырагъанда негер тергев берме герекни гьакъында да пикирлешгенлер.
Сонг да, къатынгишилени онкология аврувлагъа байлавлу англавларын артдырмагъа тарыкъны гьакъында да айтылынгъан. Неге тюгюл, олар законну даражасында аврувуна байлавлу тюз къарар къабул этип бажарма герек.
Бизин мухбирибиз.
