Гетген йылны декабр айы­ны биринчи гюнлеринде Москвада бизин къумукъ улан Бахтияр Агьматовгъа он йылдан сонг Олимпия оюнларыны чемпионуну алтын медалы тапшурулгъанны халкъыбыз уллу сююнч булан къаршылады. Шо медаль савлай Дагъыс­танны айланды десе де ялгъан болмас.

Артдагъы гюнлерде Олимпия оюнларыны чемпиону Бахтияр Агьматов, дюньяны ва Европаны чемпиону Абдусалам Гьадисов булан бирге Бабаюрт районда да къонакълыкъда болду. Шо сапарыны барышында чемпионлар Адил Янгыюртда, Гьасанайда ва Бабаюртда болдулар, яшёрюмлер булан ёлукъдулар.

Спорт ёлунда оьзлени биринчи абатларын алып тура­гъан яшлар учун дюнья оьлчевде аты айтылгъан спортчулар булан ёлугъув унутулмас кюйде оьтдю. Районгъа этген сапарын чемпионлар районну лап да уллу юртларыны бириси Адил Янгыюртдан башладылар. Адил Янгыюрт чемпионланы шатлы макъамлар булан къаршыладылар. Ёлугъувда беш юзден де артыкъ адам ортакъчылыкъ этди.

Ёлугъувну ача туруп, юртбашы Ашарапутдин Исламов къонакълагъа юртну яшёрюмлери булан ёлугъувгъа гелгени саялы теренден разилигин билдирди ва шолай ёлугъувланы оланы тарбиялавда терен таъсири барны айтды.

–Юртубузда оьсюп турагъан яш спортчулар учун бугюн – уллу байрам, – деди А.Исламов. – Артдагъы йылларда оланы спортда етишген уьстюнлюклери бизин сююндюре. Тутушуп ябушувдан Азнавур Таваев ва Динислам Тахтаров, низамсыз ябушувлардан Ризван Абуев ва Заюндин Сулейманов етишип турагъан уьстюнлюклерини арты узагъындан болажакъгъа, олар йимик спорт булан машгъул онлар булангъы адилянгыюртлу яшлар бугюнгю къонакъларыбыз Бахтияр Агьматов ва Абдусалам Гьадисов йимик янгыз юртубузну, Дагъыстаныбызны тюгюл, савлай Россиябызны атын оьр этежекге инанаман.

Ёлугъув буса жанлы кюйде оьтдю. Теберилип толгъан залдан чемпионлагъа онлар булан соравлар берилди, чинкдеси, оланы бириси де жавапсыз къалмады. Соравлар чемпионланы чемпионлукъ ёлуна, оланы яшавуна ва аралыкъларына багъышлангъан эди.

–Спортда эринчекликге ер берилмей. Гьар тренировка ярышлар йимик оьтмеге герек, озокъда, спортда утувлар да бола, утдурувлар да. Утдургъанда, кюстюнмеге бир де ярамай. Некъадар янгы ярышлагъа тындырыкълы кюйде гьазир болмагъа тюше. Балики, сизин бары да уллу утувларыгъыз алдадыр. Биз де шогъар инанабыз ва сизден уьстюнлюклер къаравуллайбыз, – деди, шолай соравланы бирине жавап къайтара туруп, Бахтияр Агьматов.

Юртгъа да гелип, чемпионлар юртда янгы чемпионланы гьазирлейген спортзалгъа гирмей гетмеге бажарылмай эди. Сонг да, лап шо вакътиде онда гиччипавланы тутушуп ябушувдан тренировкалары юрюлюп тура эди. Олимпия оюнларыны чемпиону залгъа гелгенни гёрген яшланы сююнчюн бир тюрлю кюйде де суратламагъа бажарылмай. Оланы яш юрек­леринде яшагъан умутлар бирден-эки яшавгъа чыкъды. Бахтияр Агьматов ва Абдусалам Гьадисов яш кочаплагъа спорт ёлунда уьстюнлюклер ёрадылар ва насигьатлар бердилер.

Озокъда, эсделик суратлар да алынды. Бир, он тюгюл, юзлер булангъы яшлар ва къызлар Бахтияр Агьматовну ва Абдусалам Гьадисовну гетме къоймай сагьатдан артыкъ сакъладылар.

Адил Янгыюртдан чемпионлар Гьасанай юртгъа тербендилер. Мунда да къонакъланы юртну башы Абакар Къартгишиев савлай юртну халкъы булан къаршылады. Юзлер булан суратлар, ёравлар ва насигьатлар… Шоланы санавун бирев де билмеге болмас деп эсиме геле.

Ёлугъувну жамын чыгъара туруп, Гьасанай юртну башы Абакар Къартгишиев Бахтияр Агьматовгъа ва Абдусалам Гьадисовгъа, юртда спорт байрамны оьтгермеклигине сиптечи олгъанлагъа теренден разилигин билдирди ва къонакълагъа яшавда арты битмейген насип, спорт ёлунда дагъы да оьрлюк­леге етмекни ёрады.

Бабаюрт буса къонакъланы юртну баш майданында онгарылгъан концерт булан къаршылады. Сагьнада районну белгили йыравлары оьзлени лап да яхшы йырларын Бахтияр Агьматовгъа ва Абдусалам Гьадисовгъа савгъат этдилер. Дагъыстанны маданиятыны ат къазангъан къуллукъчусу Латип Шайыпов буса къумукъ улан, Олимпия оюнланы чемпиону Бахтияр Агьматовгъа багъышлангъан «Бахтияр» деген йырын шо гюн биринчилей йырлады.

Суратлар… суратлар. Бабаюртну яшёрюмлери чемпионланы узакъ замангъа къамавгъа алдылар…

Сонг буса ёлугъув «Бабаюрт» спорткомплексде узатылды. Шо гюн залда тутушуп ябушувдан ФСБ-ни подполковниги Дагьир Закарьяевни эсделигине ба­гъышлангъан турнир оьтгерилди.

Бахтияр Агьматов турнирни ортакъчыларына уьстюнлюклер ёрады ва олардан гележекде дюньяны лап да белгили халчаларында Дагъыстанны намусун уьстюнлю кюйде якъламакъны ёрады.

Турнир къурумлу кюйде оьтдю. Халчада гючлю тогъатартывлар юрюлдю. Алдынлы ерлеге буса лап да лайыкълылар ес болдулар ва олар кубоклар, медаллар ва грамоталар булан савгъатландылар.

Турнирни гьасиллерин чыгъара туруп, тутушуп ябушувдан Бабаюрт районну баш тренери Гьажимурат Гьажиев Олимпия оюнларыны чемпиону Бахтияр Агьматовгъа, дюньяны ва Европаны чемпиону Абдусалам Гьадисовгъа гьакъ юрекден баракалла билдирди ва олардан уьлгю алып, ювукъ гележекде райондан Европаны, дюньяны ва Олимпия оюнланы чемпионлары чыгъажакъгъа къатты инанагъанны айтды.

Бахтияр Агьматовну ва Абдусалам Гьадисовну Бабаюрт районгъа сапары районну яшёрюмлерини эсинде узакъ заманлагъа къалажакъгъа шек ёкъ.

Герейхан Гьажиев, бизин мухбирибиз.