Бу байрам гюн – Россияда, алда да, гьали де халкъ оьзюне абур этип къаршылайгъан байрамланы бириси. Биревлени къаравуна гёре, 9-нчу майдагъы Уьстюнлюкню гюнюнден сонг гьюрметге лайыкълы байрам.
Эргишилени байрам гюню деп саналагъан 23-нчю февраль, гертиден де, Ватанны якъламакъ деген къуллукъгъа берилген адамлагъа багъышлангъан байрам деп гьисап этилсе де, шо гюн яшы-уллусу булан бары да эргишилени къутлавлар къаравуллама ихтияры бар деп айтсакъ да, янгылыш болмажакъ.
Теренден ахтарып къарагъанда, бу байрам Къызыл Армияны тувгъан гюню деген маънаны да бере. Къызыл Армия 1918-нчи йыл Псков ва Нарва шагьарланы бойларында юрюлген давда кайзер Германияны асгеринден уьст гелме бажаргъан. Кёп йыллар бу байрамына Къызыл Армияны ва Дав-Денгиз флотну гюню деп де айтылып турду. Къызыл Армия Уллу Ватан давда уьстюнлюк къазангъаны буса, байрам гюнню абурун бирден-бир гётере.
Февраль айны 23-нчю гюню булан Къызыл Армияны тарихине тыгъыс байлавлу болагъан бирдагъы агьвалат бар. О да – шо гюнден тутуп, артындагъы эки гюн де асгерлени сыдыраларына язылагъанланы санаву инг де кёп даражада артгъаны. Армияны сыдыраларына о вакъти гёнгюллю кюйде языла болгъан.
Къызыл Армиягъа сонг Совет Армия деп айтылагъан болду. Гьали буса биз асгер къуллукъчуланы Ватанны якълавчулары деп сыйлайбыз. Шону учун болма да ярай, бу байрам – бизин ватандашлар учун инг сыйлы байрамланы бириси.
23-нчю февральгъа халкъара байрам гюню деп айтса да, янгылыш тюгюл. Байрам алда СССР-ни ичине гирген Белоруссия, Тажикистан, Къыргъызстан республикаларда да оьтгериле.
Ёлдашны охувчуларын Ватанны якълавчуларыны гюню булан биз де къутлайбыз.
