Шулай ат булан Магьачкъаладагъы «Радуга» деген китап издательствода оьтген йылны ахырында шаир Ганибал Азизовну янгы шиъру китабы чыкъгъан. Янгы шиърулары булан бирче бу китапгъа ону алда печатдан чыгъарылгъан «Бугюн», «Тангала», «Даим» деген китапларындан алынгъан шиърулар да къошулгъан.

Артдагъы вакътиде Ганибал проза асарлар да ярата. Ону бир нече хабарлары «Ёлдаш» газетде ва «Тангчолпан» журналда да чыкъгъан. Ол «Майырылгъан тиштабан» деген пьесаны да язгъан. Автор поэзияны тармагъында чалыша туруп, кёп-кёп темаланы къуршай. Ата-бабаларыбыздан бизге варисликге къалгъан адатлар, къылыкъ тема ону шиъруларында айрыча ерни тута. Гьакъ юрекликни, тазалыкъны, гертилик булан намартлыкъны, рагьму булан зулмуну шаир поэзияны гючю булан охувчугъа енгил кюйде етишдире. Авторну тергевюн табиатны аламатлары, сююв, гьашыкълыкъ, къурдашлыкъ булан бирче тарих ва оьзге яшавлукъ темалар да тарта.



Китапдагъы асарлар беш бёлюкге бёлюнюп ерлешдирилген. «Назмулар: Дюньябыз бюркевлюкде», «Гиччи поэмалар», «Элегиялар», «Къанналар», «Сонетлер».


Бизин мухбирибиз.