Далапчылыкъны оьсдюрювню аслу мурады белгили болгъан кююнде, бизнес булан машгъул болма сюегенлени сыдыраларын толумлашдырыв экени англашыла. Шону гьисапгъа алып, артдагъы вакътилерде Дагъыстанда увакъ ва орта бизнес булан доланма умутлуланы къуллукъларын камиллешдирмек муратда ДР-ни Башчысы Владимир Васильевни ва Гьукуматыны Председатели Артём Здуновну гьаракатчылыгъы булан гьар тюрлю чаралар гёрюлегени гележек учун инамлыкъны тувдура. Озокъда, шону учун дюнья оьлчевюнде ва шолай да Россияны алдынлы регионларында топлангъан сынавну имканлыкъларындан пайдаланма тюшегени де гьакъ.
Гьали-гьалилерде «Ёлдашда» Татарстандан Дагъыстангъа къонакълай гелген «Фабрика предпринимательства» деген белгили къурумуну башчыларыны республикабызны яш далапчылары булан гьакълашыв, сынав алышдырыв жыйыны да оьтгерилди. Шону натижасында Дагъыстанда далапчылыкъ булан машгъул болма муштарлы тайпаланы къуршап, бизнес дарслар юрютмеге гёз алгъа тутулгъан эди. Шо да негьакъ болмады.
Айтмагъа сюегеним, 2018-нчи йылны декабр айыны 18-нде арадан оьтген вакътини ичинде оьтгерилген дарсланы башлапгъы натижалары тахшагьарыбызны «Россия – Мени тарихим» деген паркында белгиленди. Шону алдында «Фабрика предпринимательства» деген фондну бизнесменлеге кёмеклешив булан машгъул болагъан центрыны директору Илнур Зиннуровну ва далапчылыкъ булан машгъул болагъанлагъа кёмеклешеген Дагъыстан центрыны директору Загиди Магьмутов республикабызны маълумат къуралларыны вакиллери булан прес-конференция оьтгергени гьакъда да айрыча эсгермеге тюше.
Прес-конференцияда малим этилинген кююнде, оьтгерилген дарсланы натижаларыны гьасиллерин аян этивге байлавлу болуп оьтгерилген конгрессде 600 адам ортакъчылыкъ этмеге разилигин билдирген эди. Тек гьакъыкъатда буса, шо санав булан да дазуланмайлы, оьтгерилген чараларда 800-ге ювукъ адам ортакъчылыгъын болдурду.
Далапчылыкъны оьсдюрювге байлавлу оьтгерилеген чараны ахшамгъы жыйынында Дагъыстанны Башчысы Владимир Васильев де ортакъчылыкъ этди, жыйылгъанлагъа ёравларын аянлашдырды. Татарстанны далапчылыкъ тармакъда арадан оьтген вакътини ичинде топлангъан сынаву тергевню тартмай болмайгъаны гьакъда айта туруп, ол «Ты – предприниматель» деген гьаракат савлай Россия оьлчевюнде оьтгерилегенин эсгерди.
– Бизнес булан машгъул болма муштарлы тайпаланы къуршап, Дагъыстанда ва Татарстанда иш гёреген бажарывлу бизнесменлер булан байлавлукъда сынав алышдырыв дарсланы пайдаландырыв гележекде де тергевсюз къалмагъа ярамай, – деди Илнур Зиннуров. – Неге тюгюл, шолай дарсланы, чараланы натижасында далапчылыкъ булан машгъул болма муштарлыланы арасындан лап да къолай, асувлу бизнес-проектлери сайланып пайдаландырывгъа бериле.
Натижаланы малим этив жыйынны ахырында янгыз эки де республиканы арасындагъы байлавлукъланы камиллешдирив булан дазуланмайлы, Россияны оьзге регионларында топлангъан сынавну да къоллама тюшегени гьакъда айрыча эсгерилди.
