Шаир Супиянат Мамаеваны юбилей ахшамы

Оьтген жумагюн, 26-нчы октябрде, Магьачкъаладагъы Къумукъ театрны бинасында «Тангчолпан» журналны жаваплы редактору, шаир Супиянат Мамаеваны юбилей ахшамы оьтгерилди. Ону Дагъыс­танны халкъ артисти Имамутдин Акавов ва муаллим, шаир Женнет Мусаева юрютдюлер.

Дагъыстанны язывчуларыны союзуну правлениесини председатели, ДР-ни халкъ шаири Магьаммат Агьматов Супиянат Мамаеваны юбилейи булан къутлай туруп ону яратывчулугъуну гьакъында айтды. Шаир оьзюню халкъын, оьзюню элин сюегенни, миллетин къыйнайгъан масъалаланы гьакъында язагъанны, ону къуванчлы гюнлеринден сююнюп, шиърулар яратагъанны эсгерди. «Тангчолпан» журналны жаваплы редактору гьисапда да халкъы учун унутулмас, пайдалы иш этегенни, миллетини арасында адабиятгъа гьашыкъ болгъан, янгы язма башлагъан жагьиллени арагъа чыгъарагъанын айтды.

Магьачкъала шагьарны администрациясыны вакили Завур Гьажиалиев Супиянатгъа къутлав адрес охуду. Сагьнагъа Кёстек юртну вакиллери чакъы­рылды. Шаир Муса Шихавов юртлусун къутлай туруп, шиъру охуду. Шаир ва муаллим Супуяханым Бийболатова Кёстек юртну школасыны охувчулары булан чыкъды ва юртлусун къутлады. Охувчулар, биринден-бири алып дегенлей, Супиянатны шиъруларын чебер кюйде охуду. Кёстек юртну администрациясыны вакили Гьюсенали Абакаров юртлусун къутлай туруп, огъар уьйлер къурмакъ учун участка савгъат этди.

Ботаюртну вакиллери сагьнагъа чакъырылды. Супиянатны анасы Ботаюртдан экенин айтдылар ва ону къутладылар.

Азербайжандан гелген шаир Сафар Алжарлы Москвада Супиянат булан бирче охугъан йылларын эсгерди ва огъар къутлав сёзлер айтды.

Дагъыстанны халкъ шаирлери Агьмат Жачаев ва Багьавутдин Гьажиев къалам ёлдашын къутлады ва ону яратывчулугъуну гьакъында айтды. Къутлавлар булан аралашдырып, бизин белгили йыравларыбыз Зайнап Абсаматова, Латип Шайыпов, Зоя Сатуева, Маржанат Гьажиева, Зугьра Аселдерова, Хадижат Ибрагьимова, Зоя Чунаева Супиянат Мамаеваны шиъруларына гёре йырлар йырлады ва къаравчуланы разилигин алды.

Ногъай театрны ёлбашчысы Байсолтан Жумакъаев Супиянат булангъы ёлугъувларда ол янгы язгъан шиъруларын охуйгъанын эсгере туруп, теат­рыны коллективини атындан шаирибизни къутлады.

Хасавюрт районну вакиллерини атындан шаир ва язывчу Гебек Къонакъбиев сёйледи. Районну ёлбашчысы Жанболат Салавов оьзюню къарары булан Супиянат Мамаеваны Хасавюрт районну гьюрметли ватандашы этгенин айтды ва шаирни юбилейи булан къутлады.

Хасавюртдагъы Территория медицина бирлешивню ёлбашчысы Шихмагьаммат Дугужев, юртлусуну атына йылы сёзлер айта туруп, кёстеклилер шаири булан оьктем болагъанын эсгерди.

Композитор Хизри Батыргишиев Супиянатны сёзлерине кёп макъамлар чыгъаргъанны, олар радиода, телевидениеде йырланагъанны гьакъында айтды ва гележекде де огъар яратывчулукъ ёлунда уьстюнлюклер ёрады.

Бабаюрт районну маданият бёлюгюню ёлбашчысы Садия Даветеева сагьнагъа гитара булан чыкъды. Оьзю Германияда ишлейген заманда Супиянатны китабын даим янында сакълагъанны, ону шиърусуна оьзю макъам чыгъаргъанны айтды. Ондагъы дагъыстанлылар бирче жыйылгъанда тилеп, даим шо йырны йырлатагъанын эсгерди. Гитара согъуп шо йырны йырлады ва къаравчуланы харс урувларын къазанды.

«Каспий-Лада» деген къурумну ёлбашчысы Закарья Алимурзаевни торуну Закарья уллатасыны атындан юбилярны къутлады ва гюл байлам тапшурду.

Белгили журналист, шаир ва таржумачы Багьавутдин Узунаев Москвада адабият институтда Супиянат булан бирче охугъан йылларын эсге алды ва шаирибизни юбилейи булан къутлады.

Къаягент районну башчысыны заместители Умар Умаров районну башчысыны ва ра­йонлуланы атындан юбиляргъа къутлав сёзлер булан бирге, яратывчулукъ ёлунда уьстюнлюк­лер ёрады.

Юбилей ахшамны ахырында Супиянат Мамаева оьзюне гьюрмет этип жыйылгъанлагъа гьакъ юрекден баракалла билдирди.