Тюнегюн, август айны 23-нде, Магьачкъала шагьарда Дослукъну уьюнде билим беривню къуллукъчуларыны август айда оьтгерилеген гезикли генгеши болду. Шо генгешде Дагъыстан Республиканы Гьукуматыны Председатели Артём Здунов, ДР-ни Гьукуматыны Председателини заместители, билим беривге ва илмугъа къарайгъан министри Умупазил Омарова, ДР-ни Башчысыны ва Гьукуматыны администрациясыны ёлбашчысы Владимир Иванов, ДР-ни Халкъ Жыйыныны председателини заместители Елена Ельникова, РФ-ни охув министерлигини департаментини ёлбашчысы Светлана Нуждина, районланы, шагьарланы башчылары ва билим берив тармакъны къуллукъчулары ортакъчылыкъ этди.
Билим беривню къуллукъчуларыны август айда оьтгерилеген генгешин Артём Здунов ачды ва булай деди:
–Узакъ къалмай янгы охув йыл башлана. Биз барыбыз да бир болуп янгы охув йылда янгы уьстюнлюклеге етишме, яшлар оьр даражада билим алсын учун къаст этмеге герекбиз. Сентябр айны 1-нде бизин республикада янгы 15 школа ачыла. Школаланы да сан янын яхшы этмеге борчлубуз. Гьали бютюн Россияда милли проектлени заманы. Шо проектлерде бизин де ортакъчылыгъыбыз болмагъа герек. Артда къалмакъ деген сёзню унутуп, бары да якъдан алдынлы болуп чалышмагъа герекбиз. Сонг А. Здунов РФ-ни охув министерлигини департаментини ёлбашчысы Светлана Нуждинагъа сёз берди. Ол булай деди:
–2024-нчю йыл болгъунча Россия Федерацияны билим берив системасыны бютюн дюньяда инг яхшы билим берив системаларыны10-суну арасына гирмеге мурады бар. Шо саялы биз бары да регионлар булан бирлешип чалышмагъа герекбиз. Биз ана тиллени де якълайбыз. Охув китапланы гьазирлеп чыгъармакъны гьайындабыз. Сизин арагъызда охув китапланы, охув программаланы гьазирлегенлер бар буса, билдиргенигизни сюемен. Бирлешип ишлербиз. Сонг да, Къазан шагьарда оьтгерилген Бютюнроссия олимпиадада ортакъчылыкъ этген Дагъыстанлы яшланы уьстюнлюгюн айрыча эсгерме сюемен.
Умупазил Омарова оьз гезигинде Дагъыстан Республиканы билим берив къайдасыны гьалыны ва оьсювюню айланасында доклад этди. Дагъыстан Республикада билим берив система янгыртылма башлагъанны, Россия Федерацияны Президентини май айдагъы указын, «РФ-ни билим беривюню гьакъындагъы» Федерал законнну аслу гесимлерин яшавгъа чыгъармакъ учун къаст этегенин эсгерди. Шолай да, ДР-ни билим берив ва илму министерлиги бизин республика учун оьр даражалы касбучу къуллукъчуланы гьазирлемекни гьайында чалыша. Билим беривню барышында гьар яшны пагьумусун ачмагъа герек экенни де унутмагъа тюшмей. Озокъда, яшлар бавларыны айланасынада да четимликлер бар. Тек шоланы да чечивню гьайы этиле. Дагъыстанда 817 яшлар баву ишлей ва оларда 100 минг гиччи яшлар тарбиялана. Озокъда, яшлар бавларыны санаву аз. Бу йыл бирдагъы 18 яшлар бавун ачмагъа гёз алгъа тутулгъан. Гележекде бары да яшлагъа яшлар бавунда ерлер болажагъына умут этиле. Шондан къайры да «100 школа» деген проектни яшавгъа чыгъарывда ишлер юрюлюп тура. Дагъыстанда 26 школада 3 сменада дарслар юрюле эди. 2019-нчу йылгъа янгы школалар ачылгъан сонг 3 смена булан охуйгъан школалар къалмажакъ.
Умупазил Омарова билим берив тармакъдагъы масъалаланы кёплерин эсгерди. Шоланы арасында охутув китапланы, муаллимлени алапаларыны, бирлешген пачалыкъ экзаменлени, муаллимлени касбу даражасыны масъалаларыны гьакъында айтды.
Генгешни натижаларына гёре чыгъарылгъан къарарда бизин регионда билим берив къайдаланы янгыртывгъа ва мекенлешдиривге аслу тергев этилегенни гьакъында айтыла.
Дагъы жумада билим берив къуллукъчуланы август айда болагъан генгешлери районларда ва шагьарларда да оьтгерилежек.
