Шулай баш булан Магьачкъаладагъы «Радуга» деген издательствода шаир Адил Бийтемировну гезикли китабы чыкъгъан.

Айгъазидей уьч намусну кютгенге,

Къалгъан гюнлер къалмасын деп гьёкюнчлю.

Сабанчыдай загьмат терим тёкгенге,

Къалам тутдум китап язма дёртюнчю,–деп яза автор китапны баш бетинде.

Оьзюню савунда уллу шаирибиз Бадрутдин бу китапгъа редакторлукъ этген ва баш сёз язгъан: «Тематика якъдан алгъанда, яратывчулугъунгда сен яшавну бары да якъларын къуршайсан. «Бар болугъуз балалардан» башлап: «Намуслу эрлени зуваплы ишлерине» етгенче, сени юрегингни бир сююндюре, бир къыйнай.

Дюнья адабиятда «Ананы» темасына язмагъан шаир ёкъдур, тек сени анагъа янашывунг башгъа:

Гьажгъа барма умут булан къыламан

Беш намазны – юрек салып о якъгъа.

Женнет элден къайтгъан чакъы боламан,

Авруп ятгъан ана турса аякъгъа.

Сени шу сёзлерингни, къурдашым Адил, гьайкелге (битикге) дуаны орнуна язма ярар эди», – деп ташдыра Бадрутдин.

Китапда «Яхсай сувну сырлары», «Асрулагъа аркъа таяв эдигиз» деп ва оьзге башлар салынгъан гьар тюрлю темалагъа багъышлангъан он алты бёлюк бар.

Шаирни орусчагъа гёчюрюлген шиърулары да бу китапда ер тапгъан. Оланы таржума этген Мурат Аскеров ва Владимир Ярмоленко.

«Биринчи шиърумдан тутуп, дёртюнчю китабыма ерли гьакъ гертини язгъанман», – деп эсгере автор охувчулагъа багъышлагъан калималарында. Герти сёз ерде ятмас дегенлей, шаирни янгы китабы да ­оьзюню охувчуларын табар.