Пятница, 27.04.2018г. — «ЁЛДАШ».
Апрель айны 24-нде Дагъыстан Республиканы Башчысыны борчларын заманлыкъгъа кютеген Владимир Васильев ДР-ни Халкъ Жыйыныны 21-нчи сессиясында ортакъчылыкъ этди. Мердешленген кюйде, сессия парламент фракцияланы вакиллерини сёйлевлери булан башланды. Олар яшёрюмлени ва кёп яшлы агьлюлени якъламакъ деген масъаланы гётерди.
Шо гюн депутатлар бир нече законну проектлерин къабул этди. Шоланы арасында Дагъыстан Республиканы «Айрыча сакъланагъан табиат территориясыны гьакъында», «Дагъыстан Республикада ватандашланы савлугъун сакълавну гьакъында» деген законлагъа алышынывлар этмекге байлавлу» закон къабул этилди.
Сессияны оьлчевюнде Россияны парламентини гюнюне багъышлап Дагъыстан Республиканы Башчысыны борчларын заманлыкъгъа кютеген Владимир Васильев савгъатлар тапшурду. ДР-ни Халкъ Жыйыныны билим беривге, илмугъа, культурагъа, яшёрюмлени ишлерине, спортгъа ва туризмге къарайгъан комитетини председателини заместители Магьаммат Къурбановгъа, Дагъыстан Республиканы Халкъ Жыйыныны депутаты Руслан Ярагьматовгъа гьюрметлев грамоталар берилди.
Бизин мухбирибиз.
