Пятница, 13.04.2018г. — «ЁЛДАШ».

Гьалиден бир нече йыл алда Хожа-Агьмат Акъавов къумукъ тилде «Яхсай шагьат» деген китап чыгъаргъан эди. Бугюнлерде буса ол шо китапны ичиндеги маълуматланы генглешдирип, теренлешдирип, «Яхсай свидетель» деп орус тилде басмадан чыгъарды.

 

Хожа-Агьматны танымайгъан инсан Яхсайда ва Хасавюрт районда ёкъ деп эсиме геле. Оьзге къумукъ районларда да ону кёп танышы-билиши барны билемен. Неге тюгюл де, ол киномеханик вакътиде де, юрт советни председателини къуллугъун кютеген йылларда да, айрокъда Дагъыстанны «Сельхозтехника» бирлешивюню Яхсай бёлюгюню башчысы гьисапда чалышагъан девюрде, кёп-кёп юртланы айлангъан, колхозланы, совхозланы юрт хозяйство техника булан таъмин этген, оланы техникасына аз «ямав» салмагъан. Гьасили, Хожа-Агьмат къайсы къазанда да къайнай гелген адам.

Китапда «Уллу ватандаш давну яшларыны» къысматларын автор оьзю кёп йыллар гёрсетип юрюген киноленталарда йимик гёзден гечире. Бир- бирде агьвалатланы айы, гюню, сагьаты булан эсгере.

Китап – юртну ва юртлуланы гьакъында. Ону оху­гъан эслилер оьтген яшлыгъын эсге алар, гиччилер буса герти дюньягъа гёчген къардашларын гёргендей болар.

Хожа -Агьмат диван сакълап турагъан адам тюгюл. Ол гьаман халкъ булан, гьар кимни къыйынында-тынчында ортакъчылыкъ эте. Миллетни жамият масъалаларындан да баш къачырагъан хасияты ёкъ. Тойдан-тазиятдан да къалмас.

Сёзю ерленген атгъа тиеген, масхарасы юреклени ачагъан, «гьайт!» дегенде «вайт!» деп чыгъагъан, йыллары сексенге етишсе де, юреги яш, къаркъарасы къурч Хожа-Агьмат агъабызны гезикли китабы булан къутлай туруп, огъар, ону агьлюсюне савлукъ ва узакъ оьмюр ёрама сюемен.