Шулай ат булан оьтген йылны ахырында шаир, журналист Насрулла Байболатовну шиъру китабы чыкъды. Белгили экени йимик, яшлар учун шиърулар, хабарлар язмагъа къайсы язывчу да, къайсы шаир де тавакаллыкъ этмей. Неге тюгюл, яшлар учун язмагъа къыйын деп гьисапланып геле. Оланы тилине гёре язма, юреклерин жымырлатардай, охума муштарлы этердей асарлар яратма бек къыйын. Шо къыйын масъаланы Насрулла да оьзюню бойнуна алгъан. Яшлар учун язылгъан ону шиърулары «Ёлдаш» газетде де, «Тангчолпан» ва «Къарчыгъа» журналларда да чыгъа туруп, гиччи охувчуларыбызгъа автор тезден таныш.
Насрулланы яшлар учун чыкъгъан бу биринчи китабында гьар тюрлю темалагъа байлавлу кёп санавда шиърулар ерлешдирилген. Алты бёлюкде ерлешдирилген шиърулар шулай башлар булан белгиленген: «Гюн яхшы болсун!», «Китап тутгъан тюзелер», «Мен атамны къызыман», «Табиатны тюслери», «Чечеген ёммакълар», «Таржумалар». Башлапгъы «Охувчума» деген эки куплет шиърусунда автор яшлар булан саламлаша туруп:
Ассаламу алайкум, Яш охувчум!
Бер чи гьали, къысып къолунг алайым.
Чебер сёзге гече-гюн мен белсенип,
Янгыз сагъа къуллукъ этип талайым.
Гьар заман да юрегинге ёл табып,
Язгъанларым, къой, алдынга салайым.
Йыллар мени башым ап-акъ этсе де,
Сени булан яш чагъымда къалайым…,–деп яза автор.
Насрулла Байболатовну бу китапгъа гирген шиъруларыны аслу темалары къурдашлыкъгъа, ягь-намусгъа, инсаплыкъгъа, адилликге, табиатны аламатларына, яшланы бир-бири булангъы аралыкъларына, умутларына, хыялларына багъышлангъан. Бу асарлар яш охувчуланы юреклерине ёл табажакъгъа инанаман. Неге тюгюл де, автор яшлар англап болагъан тил булан, тынч къайдада гьар-бир агьвалатны, гьаракатны яшлагъа англашылагъан кюйде берме бажаргъан.
Ахырынчы «Таржумалар» деген бёлюкде шаир орусчагъа гёчюрген шиърулар да ерлешдирилген. Орусчадан къумукъ тилге ол белгили шаирлер Нина Орлова-Маркграфны ва Марина Агьматова-Колюбакинаны шиъруларын уста кюйде гёчюрген.
Шаирни биринчи китабы булан къутлай туруп, гележекде де яратывчулукъ ёлунда уьстюнлюклер ёрайбыз.
Я. Бийдуллаев,
адабият бёлюкню редактору.
