Январ айны 17-синде законгъа, пачалыкъ къурулушланы ва ерли оьз ишин оьзлер юрютеген къурумну комитетинде генгеш оьтгерилген. Генгешде Дагъыстан Республиканы Халкъ Жыйыныны Председатели Хизри Шихсайитов ортакъчылыкъ этген. Ол парламентге сайлавланы къайдасын алышдырма герекни таклифин берген ва Халкъ Жыйын партияланы списогуна гёре къурулгъанны эсгере туруп бир мандатлы округлардан да ватандашланы сайлама ва олагъа оьзлени ихтиярларын яшавгъа чыгъарма герекни гьакъында айтгъан. Шо гьакъда маълумат къуралларда язагъанны, Интернетден оьз пикрусун адамлар да айтагъанны эсгерген.
«Бизде пагьмулу, касбусун яхшы билеген адамлар кёп бар. Заманлар алышына, политика партиялар да алышына. Мердешленген къайдадан тайма заман болгъан. Озокъда, территория ва миллет вакиллик парламент де агьамиятлы, тек адамланы касбу усталыгъын гьисапгъа алма герек, яшёрюмлеге гьакимлик къурумлагъа ёл ачма тарыкъ. О гьал экономиканы ва жамиятны оьсювюне таъсир этежек. Гелеген сайлавлагъа гьали де уьч йыл ярым заман бар, тек буса да политика гьалланы демократия къайдагъа салма заман болгъан», – деген Х. Шихсайитов.
О комитетге ДР-ни сайлав комиссиясыны вакиллери булан бирликде, юристлени, экспертлени, илму жамиятны вакиллерини ва башгъа регионланы, олай да пачалыкъланы сынавун къоллап, шолай законну проектин гьазирлемекни, ону халкъ арада арагъа салып ойлашмакъны гьакъында айтгъан.
Ону иш къайдасын парламентни председателини заместители Камил Давдиев ва законгъа, пачалыкъ къурулушгъа ерли оьз ишин оьзлер юрютеген комитетни председатели Фикрет Ражапов якълагъанлар ва 53 субъектде сайлавлар шо къайдада юрюлегенни ва ерли башгъачалыкъланы гьакъында ойлашмакъны гьакъында айтгъанлар.
Республикада адамланы ихтиярларын якълайгъан вакил Уммупазил Омарова да шо къайданы якълайгъанны билдирген. Гьар ватандашгъа оьзюне берилген ихтиярланы яшавгъа чыгъарма имканлыкъ бермекни ва жамиятны пикрусун гьисапгъа алма герекни гьакъында айтгъан.
Бизин мухбирибиз.
