Шулай чакъырыв булан Дагъыстанда сентябрни 14-нден 16-сы болгъанча халкъара форум юрюлдю. Ону ишинде Къазахстандан, Грузиядан, Азербайжандан, Россияны регионларындан, Темиркъазыкъ Кавказны республикаларындан 30-гъа ювукъ журналистлер ортакъчылыкъ этди. Форумну ортакъчылары булан поэзияны театрында Дагъыстанны Башчысы Рамазан Абдулатипов да ёлукъду.
Бу ёлугъувну Дагъыстанны журналистлерини союзуну председатели Али Камалов ачды ва юрютдю. Ол айтгъан кюйде, Каспий денгизге байлавлу биринчи саммит 2000-нчи йыл Татарстанда оьтгерилген. Шонда Россияны Президенти Владимир Путин, о заман РФ-ни Гьукуматыны вице-премьери болуп ишлейген Рамазан Абдулатипов да болгъан. Татарстанны президенти М.Шаймиев ва Россияны журналистлерини союзуну председатели В.Богданов булангъы ёлугъувда Каспий денгизни ва Волга оьзенни масъалаларына гёре ёлугъув оьтгермекни масъаласы чыкъгъан. Р.Абдулатипов шо гьакъда ойлашмакъны ва ишлемекни таклиф этген. В.Богданов буса «Каспийни рагьмулу юреги» деген белгини токъташдырмакъны бойнуна алгъан ва этдирген.
Дагъыстанны Башчысы эсгерген кюйде, В.Богданов булан булай форумну оьтгермекни масъаласы кёп керенлер арагъа чыкъгъан. Каспийни бойларыны Дагъыстанны оьсювю учун кёп уллу имканлыкълары бар.
–Биз оьсюв учун «Каспийский транспортно-логистический и морской индустриальный комплекс» деген уллу проектни таклиф этгенбиз. Шогъар гёре пароходлар къурагъан ва ярашдырагъан заводлар, биотехнология завод къурув гёз алгъа тутулгъан. Биринчи абатлар алынгъан,–деди Р.Абдулатипов. Сонг да, ол Дагъыстандагъы социал-экономика ва жамият-политика гьалланы гьакъында да айтды. Бир нече йыллар алда «Седой Каспий» деген дискуссия клуб иш гёргенни ва ону ишин янгыртмакъны гьакъында эсгерди.
Всеволод Богданов Дагъыстанда бир нече керен болгъанын айтды. Гьар гелгенде оьзю учун янгылыкълар ачагъанын , форумгъа байлавлу буса Каспий ягъа территорияларда парахатлыкъны ва бирликни болдурмакъ учун агьамиятлы роль ойнайгъанын эсгерди.
Гелген къонакълардан «Астраханские новости» деген газетни баш редактору Алексей Нечаев, Ингушетияны журналистлерини союзуну председатели Шамсутдин Боков, Татарстанны журналистлерини союзуну председатели Римма Ратникова да оьзлени пикруларын айтды.
«Каспийни рагьмулу юреги» деген РФ-ни журналистлерини союзуну белгиси биринчилей 13 яшы бар Асият Магьамматовагъа тапшурулду (Хасавюрт районну Октябрское юрту). В. Богданов шолай белгини Рамазан Абдулатиповгъа да тапшурду.
– Россияны журналистлери Дагъыстангъа къыйынлы заманларда бизин гьакъыбызда кёп рагьмулу сёзлер язды, якълады. Шо ишде сизин пайыгъыз да бар. Шону учун сизге баракалла, – деди Р. Абдулатипов, «Дагъыстан Республиканы алдында этген къуллукълары учун» деген орден булан Всеволод Богдановну савгъатлай туруп.
